په کابل پوهنتون کې د تحصیلي نصاب ښوونیزه برنامه دائره شوه

د روان کال د لړم میاشتې په ۹ نیټه د مسلکي انکشاف آمریت (PDC) د پخوا په شان د استادانو د علمي وړتیا لوړولو په خاطر د تحصیلي نصاب د پراختیا په برخه کې (د لوړو زده کړو وزارت لخوا د منل شوي تحصیلي نصاب بیا کتنه او پراختیا ورکول) تر سرلیک لاندې ښوونیزه برنامه دائره شوه.

په دغه برنامه کې هغه استادانو برخه اخیستې وه، چې د تحصیلي نصاب د پراختیا او بیا کتنې کمیټې او پوهنځیو سره یې مرسته کړې وه.

د پوهنتون علمي مرستیال ښاغلی پوهاند محمد شفیع شریفي په یاده برنامه کې د ګډون ترڅنګ د موضوع اړوند خبرې وکړې د مخکني، اوسني او راتلونکي تحصیلي نصاب په جوړښت، انکشاف، د ټولنې اړتیاوو، کاري فرصتونو او د ټکنالوژۍ د پرمختګ په اړه یې خپل تهیه کړی پریزینټشن وړاندې کړ، ښاغلي شریفي هیله وکړه چې یاد ورکشاپ به ښې پایلې ولري.

همدارنګه د استادانو د مسلکي انکشاف (PDC) آمر ښاغلي پوهنوال دکتور فرید احمد طنین په یاده برنامه کې د علمي مرستیال او استادانو له ګډون څخه مننه وکړه نوموړی ورکشاپ یې د غوره تحصیلي نصاب لپاره اغیزمن یاد کړ.

دکتور طنین هم د پوهنتون لپاره د معیاري نصاب د برابرولو په اړه خپل پریزیڼټشن له ګډونوالو سره شریک کړ.

په یاد ورکشاپ کې ګډونوالو او استادانو د یادې موضوع په اړه خپلې طرحې، وړاندیزونه او نظریات شریک او له مسئولینو څخه یې ورته د پام کولو غوښتنه وکړه.

له دې ټولو سره سره به په راتلونکي کې د پوهنتون په مهمو او اساسي موضوعاتو دې ته ورته نور ورکشاپونه او سیمینارونه  هم دائر شي.