د کابل پوهنتون د علمي چارو مرستیال د تاشکند دولتي پوهنتون په کوربتوب د علي شیر نوايي په نړۍ وال کنفرانس کې ګډون وکړ
د کابل پوهنتون د علمي چارو مرستیال پوهاند محمد شفیع شریفي د تاشکند دولتي پوهنتون له لوري د علي شیرنوايي په نړۍ کنفرانس کې، چې په انلاین ډول جوړ شوی وو، د نړۍ د مختلفو ۶۰ پوهنتونونو او اکاډمیکو بنسټونو استازو پکې ګډون کړی وو.
پوهاند شریفي د دې کنفرانس په پرانیسته کې د کابل پوهنتون په استازیتوب د تاشکند د دولتي پوهنتون رییسې مېرمن ګل چهره رخسویوه، د ازبکستان د لوړو او منځنیو زده کړو وزیر عبدالقادر تولشکولوف او د علي شیرنوايي نړۍ وال کنفرانس نورو ګډونوالو څخه یې مننه وکړه او د دې کنفرانس په جوړولو یې خوښي وښوده.
پوهاند شریفي په خپلو خبرو کې وویل: د نړۍ د معنویت لوی شخصیت، وزیر، سلاکار او د حسین بایقرا ملګري، دوه ژبي شاعر، ټولنیز منتقد، ژباړن، تاریخ لیکوونکي، سیاستمدار او په خراسان او ماورالنهر او په نورو برخو کې د زیاتو خیره بنسټونو بنسټګر امیر علي شیر نوايي څخه پنځه سوه اتیا کاله تیریږي ولې تر اوسه پورې یې د ازبکي او فارسي ژبې شعرونه یې د افغانستان د ژبو په کتابونو کې لیدل کیږي. د نوايي ادبي فعالیتونه یواځې په افغانستان او د نړۍ په نورو برخو کې او هم د ازبکي ژبې په غني کېدو کې زیات مهم شمېرل کیږي. د افغانستان زیات شاعران د نوايي د شعرونو د سبک، ژبې، وزن او قافیې تر تاثیر لاندې راغلي او هغه یې په دوه ژبو شاعران کې تعقیب کړی دی.
زیات شاعران يواځې په افغانستان کې نه بلکې په ازبکستان، ایران، ترکمستان، ترکیې او اذربایجان کې یې هم د نوموړي له الهام ورکوونکو اثارو او فلسفي لیدلورو څخه یې په هنري او غوره کمال سره ګټه پورته کړي. نوموړی د خپلو شعرونو او سیاسي تفکر سره په یو لوی مدني شخصیت باندې بدل او د افغانستان په تاریخ کې یې لوړ ځای درلود.
پوهاند شریفي د افغانستان د ولسمشر ښاغلي محمد اشرف غني وینا، چې په ۲۰۱۶ کال کې یې د نوايي ۵۷۵ کلنۍ په ویاړ، چې د ولسمشرۍ ماڼۍ- ارګ کې د جوړ شوي نړۍ وال سمپوزیم کې کړې وه، د تکرار په ډول وايي: "امیر شیرعلي نوايي په معاصر تاریخ کې په ترکي او ازبکي ژبه کې لکه د خوشحال خان موقف درلود او لکه څرنګه، چې په پښتو ادبیاتو خوشحال خان د عطف ټکی وو/ دی، همدارنګه په ترکي- ازبکي ادبیاتو کې شیر نوايي د عطف ټکی او د یوې نوې دورې پیل دی".
پوهاند شریفي وویل، د لوی علمي او کلتوري شخصیت مقام او منزلت څخه یادونه د یو هیواد د لوی تمدن او شانداره جشن بیان دی، دا مونږ خپل تېر تمدن او لویو فرهنګي پایو سره نښلوي او زمونږ د تاریخ له دورو څخه الهام اخلي. زه د تاشکند دولتي پوهنتون ته د دې سمپوزیوم د جوړېدو مبارکي وایم. ای کاش د کرونا ساري ویروس نه وای تر څو مو دا شېبې له خپلو ورونو سره په تاشکند کې لمانځلې وې.
پوهاند شریفي په پای کې د تاشکند دولتي پوهنتون مسوولانو ته وړاندیز وکړ، چې کابل پوهنتون د امیر علي شیرنوايي په نوم یوه ګډه تحصیلي برنامې جوړېدو لپاره امادګي درلوده او د هغې د جوړېدو مینه وال دي او د دې کنفرانس ګډون کوونکو ته یې د بریالیتوب هیله وکړه.
دا دوه ورځينۍ کنفرانس د ۲۰۲۱ کال د فبروري له ۵ تر ۶ نېټې پورې د دوه ورځو لپاره د نړۍ د ۱۵ هیوادونو څخه د ۶۰ پوهنتونونو او اکاډمیکو بنسټونو د ۱۳۰ وینالوالو په ګډون د تاشکند دولتي پوهنتون په کوربتوب جوړ شوی وو.
