کابل ته په بریالي توګه د مجاهدینو د داخلېدو دوهم کال په تړاو غونډه ترسره شوه
د زمري ۲۴ مه نېټه کابل ښار ته په بریالي توګه د مجاهدینو دداخلېدو او بهرنیو قواوو د ماتې دوهم کال د لوړو زده کړو وزارت رهبرۍ، د مرکزي او کابل پوهنتون رهبریو، استادانو او محصلینو په ګډون و نمانځل شوه.
دلوړو زده کړو وزارت سرپرست ښاغلي شیخ ندا محمد ندیم د خپلو خبرو په لړ کې د نظام رهبرۍ او لوړ پوړو چارو واکو ته د یادې ورځې په مناسبت مبارکي وویله او هغه یې د هېواد په تاریخ کې سرلوړې او عزتمنده ورځ یاده کړه، نوموړي زیاته کړه، چې الله ج په دې ورځ د افغانستان خلکو ته لوی نعمت ورپه برخه کړ، چې دهغه باید قدر دانی وشي؛ د لوړو زده کړو سرپرست له استادانو او محصلینو وغوښتل؛ ترڅو په پوره هڅه د اسلامي نظام د ساتنې او بقاء لپاره هڅې وکړي.
دلوړو زده کړو وزارت علمي مرستیال ښاغلي لطف الله خیرخواه یاده ورځ د مسلمانانو لپاره د خوښۍ او ویاړ ډکه وبلله او زیاته یې کړه؛ چې نوموړې بریا په حقیقت کې د ټولو مسلمه امت بریا ده.
همدارنګه د لوړو وزارت محصلانو چارو معین ښاغلي مفتي طاهر احمد د زمري ۲۴ مه لویه بریا یاده کړه او ټینګار یې وکړ؛ چې د یادې بریا ساتنه هغه وخت شونې ده؛ چې موږ د علم او پوهې په میدان کې پرمختګ او آزادي ولرو او له خپلو علمي کادرونو او محصلینو څخه ملاتړ وکړو.
د کابل پوهنتون استاد ښاغلي روضت الله مجید، د کابل ښوونې او روزنې پوهنتون استاد ښاغلي عبدالقدوس مظهري او د کابل پولتخنیک پوهنتون استاد ښاغلي عبدالکریم افغان هر یوه د هېوادپه تاریخ کې دیادې ورځې د مقام او ارزښت په اړه خبرې وکړې.
د یادونې ده، چې په یاده غونډه کې د کابل پوهنتون هنرونو پوهنځي محصلینو لخوا بیلابیلې ترانې، دتیاتر ښوودنه، مستند فلم، تمثیلي پارچه، د عکسونو نندارتون او ګرافیکي هنرونه وړاندې شول؛ چې د مېلمنو او ګډونوالو د پاملرنې او ستاینې وړ و ګرځېدل.
