په کابل پوهنتون کې د کانګو تبې ناروغۍ په زیانونو او پر وړاندې یې د مبارزې په لارو علمي کنفرانی ترسره شو
نوموړی علمي کنفرانس د روان کال غبرګولي په ۱۷ نېټه د چهارشنبې په ورځ د وترنري علومو پوهنځي لخوا دایر شوی وو؛ چې د پوهنتون بیلابیلو پوهنځیو محصلینو او استادانو پکې برخه اخیستې وه.
د وترنري علومو پوهنځي سرپرست ښاغلي پوهنوال داکتر اسدالله حامد ددې کنفرانس اساسي موخه د انسانانو او حیواناتو ترمنځ ګډې ناروغۍ ( زونوز) او په ځانګړي توګه د کانګو تبې په اړه استادانو او محصلینو ته پوهاوی یاد کړ؛ تر څو ددوی پواسطه یې کورنۍ ته پوهاوی ورکړل شي.
د پوهنتون د علمي چارو مرستیال ښاغلي محمد اشرف غیرت او محصلانو چارو مرستیال ښاغلی صلاح الدین ایوبی هم په همدې کنفرانس کې ګډون درلود؛ هغوی دیاد کنفرانس ددایرېدو له امله د وترنري پوهنځي له رهبرۍ او استادانو څخه مننه وکړه.
په دې کنفرانس کې د وترنري علومو پوهنځي استاد ښاغلي پوهنوال داکتر اسدالله صمدي د کانګو تبې په ناروغۍ، حیواناتو او انسانانو ته د انتقال په برخه کې د کنې رول په اړه خبرې وکړې؛ د راتلونکي ګرم موسم او د لوی اختر په رارسېدو سره د ددې ناروغۍ په زیانونو او د اخته کېدو مخنیوي په اړه یې ګډونوالو ته معلومات وړاندې کړل؛ چې ددوی د پاملرنې وړ وګرځیدل.
