د کنفوسیوس انستیتوت رهبري هیئت په کلنۍ غونډه کې د کابل پوهنتون رئیس ښاغلي دکتور اسامه عزیز او د بهرنيو ژبو او ادبياتو رئيس ښاغلي پوهنوال ګل محمد باسل چې په چین هېواد کې " د کنفوسیوس انستیتوت سیمه ایز دایرکترانو سیمینار" ترعنوان لاندې جوړه شوې وه ګډون وکړ
د کنفوسیوس انستیتوت د 2008 میلادي کال را پدیخوا د کابل پوهنتون د چینایي ژبو او ادبیاتو ديپارتمنت په همکارۍ د چین هېواد تای یوان او په کابل پوهنتون کې د مرکزي کنفوسیوس انستیتوت (د چینایي ژبې زده کړې نړیوال بنسټ) ترمنځ د هوکړه لیک پر اساس د بهرنیو ژبو او ادبیاتو په چوکاټ کې فعالیت ترسره کوي.
د چینایي ژبې زده کړې نړیوال بنسټ چې په نړۍ کې د کنفوسیوس انستیتوتونو د مدیریت او همغږۍ مسؤلیت پر غاړه لري، د مرستندویه بنسټونو د همکارۍ, پراختیا او پیاوړتیا په موخه د ۰۳/۰۷/۲۰۲۳ نېټې څخه د ۲۶ هېوادو څخه ۲۸ تنه سیمه ایزو دایرکترانو او د چین هېواد ۹ تنه پروفیسور او څیړونکو لپاره د شانګهای ښار شرق چین ښوونې او روزنې پوهنتون کې ۹ ورځینی سیمنار جوړ کړ. ګډونوالو د (کنفوسیوس انستیتوت پراختیا یي ځانګړتیاوو او اهمیت) او (په کنفوسیوس انستیتوت کې د زده کړې کیفیت کچې لوړولو څرنګوالی) تر عنوان لاندې خپل سیمنارونه وړاندې کړل چې د کابل پوهنتون کنفوسیوس انستیتوت په استازیتوب د بهرنیو ژبو او ادبیاتو پوهنځي رئیس پوهنوال ګل محمد باسل د ياد انستیتوت افغاني دایرکتر په حیث په یاد سیمنار کې ګډون درلود چې د یاد سیمنار له پای ته رسېدو وروسته د جولای په ۱۱مه نېټه د (کابل پوهنتون کنفوسیوس انستیتوت مدیره هیئت) په کلنۍ غونډه کې د ګډون په موخه د شانګ های ښار پرېښود.
له نېکمرغه د بهرنیو وګړو پرمخ د چین هېواد د پولو خلاصېدل او د کابل پوهنتون کنفوسیوس انستیتوت د دوامداره هڅو پر اساس د (کابل پوهنتون کنفوسیوس انستیتوت مدیره هیئت) کلنۍ غونډه په حضوري ډول په ۱۷/۰۷/۲۰۲۳ نېټه په تای یوان پوهنتون کې له افغانستان څخه د ویدیو کنفرانس له لارې د کابل پوهنتون رئیس ښاغلي دکتور اسامه عزیز د بورد رئیس په توګه، د بهرنیو ژبو او ادبیاتو پوهنځي رئیس ښاغلي پوهنوال ګل محمد باسل د کنفوسیوس انستیتوت افغاني دایرکتر او د بورد د مرستیال په توګه، ښاغلي پوهنیار حمید غلامي د چینایي ژبې او ادبیاتو ډیپارټمنټ د کنفوسیوس انستیتوت اجرائیوي ډایرکټر په توګه، ښاغلي پوهنیار شاهین یوسف زاده او استاد وحیدالله حلیمي د بورد د غړو په توګه د ویدیو کنفرانس له لارې په ياده غونډه کې ګډون درلود؛ چې د انستیتوت د تیر کال په کړنو او د راتلونکي کال د عملیاتي پلان په اړه یې خبرې وکړې. همدارنګه په یاده غونډه کې د غړو په هوکړه د کابل پوهنتون کنفونسیوس انستیتوت د چاروغوره مدیریت لپاره نوي غړي و ټاکل شول.
ددې غونډې په څنډه کې د کابل پوهنتون په نماینده ګۍ ښاغلي ګل محمد باسل د کابل پوهنتون کنفوسیوس انستیتوت په اوسني وضعیت، د چینایي ژبې او ادبیاتو پر بورسونو، کابل پوهنتون ته د چین هېواد کې د اوسېدونکو استادانو بیرته را ګرځېدل، د تای یوان تکنالوژۍ پوهنتون نړیوالو اړیکو او زده کړې پوهنځي له رئیس او د بهرنیو اړیکو رئيس او مرستیالانو سره د نورو علمي برخو د پراختيا او همکارۍ په اړه خبرې وشوې، په یاد پوهنتون کې د افغان محصلینو ځانګړې ناسته هم ترسره شوه؛ چې د تحصیلي دورې پر وضعیت او ستونزو یې خبرې وکړې او دهغوی غوښتنې یې واورېدې.
