د کابل پوهنتون (۷) پوهنځیو د وروستي کال محصلینو ته د اس، پي، اس، اس ( SPSS) او د هغه په واسطه د شمېرو تحلیل ورکشاف جوړ شو
نوموړی ورکشاف د څلورو اوونیو په لړ کې د پنجشنبې په ورځ د سهار له (9:30 څخه 11:30) پورې د امام محمد شیباني (رح) تدریسي بلاک کې د وترنري، ټولنیزو علومو، اروا پوهنې، فارمسي، چاپیریال پوهنې، کرنې او عامه پالیسي پوهنځیو ورستي کال محصلینو ته جوړ شو.
د دې ورکشاف موخه د څېړنیزو پروژو او په ځانګړې توګه مونو ګراف بشپړولو لپاره د محصلینو د ظرفیت لوړول بلل شوي، یاده برنامه د محصلانو انسجام آمریت سره په همغږۍ جوړه شوې ده، چې د تدریس چارې یې د وترنري پوهنځي استاد پوهنوال داکتر اسدالله صمدي له خوا پرمخ وړل کیږي.
محصلینو ته د وینا پر مهال داکتر صمدي وویل: د(SPSS) برنامې د پیژندنې ترڅنګ به محصلینو ته د اکسېل په پروګرام کې فرضي او حقیقي ارقام په اړه هم معلومات وړاندې شي، دده په وینا نوموړی ورکشاف د کابل پوهنتون پاتې پوهنځيو وروستي کال محصلینو ته هم جوړېږي.
دا په داسې حال کې ده، چې تیره ورځ د محصلانو د انسجام آمریت لخوا دوه زده کړییزې برنامې د کار موندنې مهارتونه او کمپیوتر برنامو زده کړه په برخه کې هم ترسره شوې دي.
