د کابل پوهنتون علمي شورا نوبتي ناسته جوړه شوه
د کابل پوهنتون علمي شورا نوبتي ناسته د کابل پوهنتون د رییس پوهاند دکتور محمد عثمان بابري په ریاست او د دې ریاست د مرستیالانو او علمي شورا د غړوپه ګډون جوړه شوه. دا ناسته د روان ۱۴۰۰ د سرطان په لومړۍ نېټه د سې شنبې په ورځ جوړه او د کابل پوهنتون اړوند مهمو موضوعاتو باندې خبرې وشوې او اړین تصمیمونه ونیول شول.
د کابل پوهنتون رییس پوهاند دکتور محمد عثمان بابري په خپلو پرانیستو خبرو کې د ناستې غړو ته د ښه راغلاست تر څنګ یې تاکید وکړ، چې استادان مکلف دي تر څو درسونو ته په انلاین ډول دوام ورکړي او د پوهنځیو رییسان او د څانګو مسوولین د دا خبره جدي ونیسي او د کابل پوهنتون ریاست ته د هغې راپور شریک کړي. پوهاند بابري زیاته کړه، چې ځینې تر لاسه شوي راپورونه ښيي، چې د کابل پوهنتون د محصلینو لپاره په انلاین ډول درسونه ښه وو او دا هیله بښوونکي ده او هیله لرو تر پایه دوام ومومي. د کابل پوهنتون رییس د خپلو خبرو په بله برخه کې د پوهنځیو رییسانو ته وویل، چې هوکړه لیکونو ته رسېدنه وشي او هغه په سم او بنسټیزه توګه و ارزول شي تر څو د کابل پوهنتون رهبري لپاره هغو د لاسلیک کار اسانه او دقیق شي.
د علمي شورا پدې ناسته کې په څلورو اړوندو علمي مسایلو، د ورځې او شپې او درسونو د کیفیت د ارزونې په هکله راپور، د استادانو علمي ترفیعاتو درې دوسیې او پنځه متفرقه موضوع ګانې د قوانینو، مقرراتو، لایحو او طرزالعمل په رڼا کې خبرې وشوې او د رایو په اکثریت یې په هرې یوې باندې خبرې وشوې او اړین تصمیم ونیول شول.
