د کابل پوهنتون رهبري هیئت د ۱۳۹۹ کال د نوي شامېلېدونکو محصلینو د نوملیکنې له بهیر څخه لیدنه وکړه

د کابل پوهنتون رهبري هیئت د لړم میاشتې په ۴ نېټه د یک شنبې په ورځ د ۱۳۹۹ کال د نوې شامېلېدونکو محصلینو د نوملیکنې (HEMIS) – دویمې ورځې له بهیر څخه، چې د پوهنتون د علمي شورا د پرېکړې پربنسټ، د روان کال د لړم میاشتې په ۳ نېټه د شنبې په ورځ پیل شوې وه، لیدنه وکړه.

د کابل پوهنتون رییس پوهاند دکتور محمد عثمان بابري په داسې حال کې، چې د محصلینو او د مالي او اداري چارو مرستیالانو له لوري یې ملتیا کوله خبرې وکړې او د کابل پوهنتون نوي محصلینو ته یې د ښه راغلاست ترڅنګ په عادي ډول د نوملیکنې بهیر په پرمختګ خوښي وښوده، زیاته یې کړه، چې سږ کال د نویو محصلینو نوملیکنه د (HEMIS) نوي، روڼ او عصري سیسټم له لارې تر سره کیږي، چې دا د هیواد دلوړو زده کړو نظام کې د پرمختګ ښودنه کوي او د دې برخې مسوولین په ځانګړي توګه د کابل پوهنتون متعهد دی تر څو ټولنې ته د زده کړیالانو د غوره نسل وړاندې کولو لپاره د با کیفیته زده کړې او پوهې زمینې برابرولو  لپاره تر دې غوره چارې تر سره کړي. ښاغلي بابري له محصلینو څخه وغوښتل، چې د هیواد یو قدیمي او غوره پوهنتون ته داخل شوي دي، هر ډول سیمه ییزو، قومي، ژبني او نورو غلطو تړاوونو څخه لرې، هڅه وکړي تر څو هغه تر پخوا ښه او په متعهدانه ډول د غوره علم او پوهې په تر لاسه کولو کې خپل مقام لوړ کړي.

د کابل پوهنتون د محصلینو چارو مرستیال پوهندوی فیصل امین د دې بهیر په پیل کې د نوملیکنې پر ځای کې د یادو پوهنځیو نوې شامېلېدونکو محصلینو په حضور کې خبرې وکړې او د دې محصلینو راتګ ته د ښه راغلاست تر څنګ یې د کابل پوهنتون په مقام او پدې پوهنتون کې د درسونو په بهیر او کچې خبرې وکړې. پوهندوی فیصل امین د نوملیکنې پر مهال د میکانیزم او ډیسپلین، ټولنیز واټن، د بې نظمۍ مخنیوی او ... په پام کې نیولو باندې تاکید وکړ او پدې توګه د پوهنتون د مني سمسټر او لومړي سمسټر درسونه د روان ۱۳۹۹ کال د لړم میاشتې په ۳ نېټه په جدي توګه پیلیږي او د پوهنځیو د لارښوونې پربنسټ به په راتلونکو ورځو کې جریان ومومي او له محصلینو څخه یې وغوښتل تر څو په منظم ډول په ټولګیو کې حاضر شي.

د کابل پوهنتون د مني سمسټر او لومړي سمسټر درسونه د نویو محصلینو د نوملیکنې سره په هممهاله توګه د ۱۳۹۹ کال د لړم میاشتې په ۳ نېټه  پیل او په جدي توګه به دوام ومومي او پدې توګه له ښاغلو محصلینو څخه غوښتنه کیږي تر څو په منظم ډول خپلو درسونو ته حاضر شي.