د کابل پوهنتون رئیس د فارمسي پوهنځي محصلینو د مونوګرافونو د دفاع په پروګرام کې ګډون وکړ
د فارمسي پوهنځي فارغ التحصیل محصلینو د یوې غونډې په ترڅ کې د خپلو تحصیلي مونوګرافونو څخه دفاع وکړه. پدې پروګرام کې د پوهنتون رئیس ښاغلي دکتور اسامه عزیز، د محصلانو چارو معاونیت سرپرست پوهنمل معاذ الله نسیم، د فارمسي پوهنځي رئیس او استادانو ګډون کړی وو.
لومړی د فارمسي پوهنځي رئیس ښاغلي پوهنوال آقامحمد ژکفرخبرې وکړې او په غونډه کې یې د پوهنتون د رئیس له شتون څخه مننه وکړه او زیاته یې کړه، چې د فارمسي پوهنځي محصلینو د خپلو مونوګرافونو په ترتیبولو کې زیاتې هلې ځلې کړې او د څېړنې له معیاري مېتودونو څخه یې پکې کار اخیستی دی.
وروسته د پوهنتون رئیس ښاغلي دکتور اسامه عزیز د خپلو خبرو په ترڅ کې د تضمین کیفیت او نورو علمي برخو اړوند د فارمسي پوهنځي د علمي کړنو ستاینه، د روغتیا او صحت په برخه کې یې د فارمسي څانګې رول خورا مهم او ارزښتناک وباله، دکتور عزیز ټینګار وکړ چې ټول فارغ التحصیل محصلین باید په پاکه اراده ټولنې ته خدمت وکړي.
پدغه پروګرام کې محصلینو پخپل نوبت سره خپل ټاکل شوي مونوګرافونه دفاع کړل.
