د کابل پوهنتون د کرنې پوهنځي رئیس او یو شمیر استادانو د کرنې وزارت سرپرست وزیر سره غونډه تر سره کړه
د کرنې پوهنځي رئیس او د کرنې يوهنځي یو شمیر مشرانو استادانو د کرنې، اوبولګولو او مالدارۍ وزارت سرپرست وزیر مولوی عطاءالله عمري سره د زراعتي سکتور په پرمختګ او په کې د کرنې اړوند د اکادمیک بنسټونو رول او همکاري اړوند تفصیلی مجلس درلود.
د کابل پوهنتون د کرنې پوهنځي رئیس پوهنیار صفی الله جوهر څرګنده کړه چې په کرنیزو چارو کې د دوی نظرونه باید په پام کې ونیول شي او دغه راز د ترویج او څېړنې په برخه کې د خپلو اړتیاوو د برابرولو او ستونزو ته د رسېدنې غوښتونکي شو.
دکرنې پوهنځی استادانو د کرنې په سکټور کې د همکارۍ په موخه خپل نظرونه د کرنې سرپرست وزیر سره شریک کړل او ورته د پاملرنې غوښتونکي شول. همداراز د محصلینو لپاره لنډ مهال کار زده کړې دورې، د لازمو وسایلو مرستې غوښتنه وکړه.
د کرنې وزارت سرپرست رئیس نوموړي پلاوي ته د هرکلي تر څنګ د هر راز همکاري وعده وکړه چې ممکنه هڅې به ترسره کوي او په دې اړه یې د ریاست الوزارء او نورو مشرانو سره بېلا بېلې طرحې شریکې کړي دي.
په پای کې د کابل پوهنتون کرنې پوهنځي او د کرنې وزارت تر منځ په یو هر اړخیز تفاهم لیک هوکړه وشوه چې تر اماده کولو وروسته به لاسلیک شي او په دې برخه کې به مناسب اقدامات ترسره شي.
