د کابل پوهنتون د مشاورې د برخې استادانو له لوري په نړۍ واله کچه د افغانستان د خلکو له نظره د ټولنیزې رواني روغتیا تر عنوان لاندې د ګډې څېړنې پایله وړاندې شوه

د سولې، دوستي او عدالت (Peace, Love, and Justice) تر عنوان لاندې د یوې ګډې علمي څېړنې پایلې، چې د کابل پوهنتون د ارواپوهنې او روزنیزو علومو پوهنځي د مشاورې د برخې استادانو، د نیویارک ښاري پوهنتون د هانټر کالج استادانو او د هرات پوهنتون د مشاورې څانګې استادانو په ګډه، په نړۍ واله کچه د افغانستان د خلکو له نظره د ټولنیزې رواني روغتیا ارزونې په موخه تر سره شوې وه، د ۵۵ هیوادونو څخه تر ۱۰۰ زیاتو کسانو په انلاین ډول ګډون درلود وړاندې شو.

دا سمینار، چې د روان ۱۳۹۹ د کب په ۶ نېټه د Inter – Agency Standing Committee IASC نړۍوال بنسټ په کوربتوب جوړه شوې وه، د کابل پوهنتون د مشاورې څانګې استادانو هر یو پوهنمل مریم احمدي، پوهندوی سپوږمۍ اوریا، پوهنوال ریحانه فقیري او د ارواپوهنې پوهنځي رییس پوهنوال ستارالدین صدیقي له لوري د کابل پوهنتون د علمي شورا له تالاره وړاندې شو.

د دې علمي سمینار ګډونکوونکي، چې د نړۍ له مختلفو برخو څخه یې په برنامه کې د حضور لپاره نوملیکنه کړې وه، د برنامې په پای کې هر یو د موضوع په اړه خپل نظریات، وړاندیزونه او لیدلوري بیان او همدارنګه د موضوع وړاندې کوونکو استادانو هر ګډونکوونکي ته لازم ځوابونه ورکړل.

دا څېړنه د پورته ذکر شوو استادانو، د کابل پوهنتون د ارواپوهنې پوهنځي د مشاورې څانګې استادانو پوهنمل بېژن ایوبي او پوهنیار ذکرالله فایق او همدارنګه د هرات پوهنتون د مشاورې څانګې استادانو او د نیویارک ښاري پوهنتون د هانټر کالج استادانو له لوري تر سره شوې وه.