د کابل پوهنتون او د ایران هیواد د انساني علومو او فرهنګي مطالعاتو انسټیټوټ ترمنځ د علمي او څېړنیزو همکاریو هوکړه لیک لاسلیک شو
د کابل پوهنتون او د ایران هیواد د انساني علومو او فرهنګي مطالعاتو انسټیټوټ ترمنځ د همکاریو هوکړه لیک د روان کال د سلواغې میاشتې په لومړۍ نېټه د یوې غونډې په لړ کې د کابل پوهنتون رییس، د علمي چارو مرستیال، د محصلینو چارو مرستیال او د کابل پوهنتون د ژبو او ادبیاتو پوهنځي رییس او په غیر رسمي او انلاین ډول د ایران هیواد انساني علومو او فرهنګي مطالعاتو انسټیټوټ رییس دکتور حسین علي قبادي، په کابل کې د ایران سفارت فرهنګي رایزن غلام حسین شیرزاد مقدم او د دې انسټیټوټ د نړۍ والو اړیکو رییسې مېرمن دکتورې شکوه حسیني په ګډون د دواړو بنسټونو ترمنځ د علمي، فرهنګي، څېړنیزو او په دواړو بنسټونو کې د شته ظرفیت د لوړونې لپاره د زمینې برابرولو په موخه لاسلیک شو.
د دې همکاریو هوکړه لیک لویه موخه د استادانو تبادله، د دواړو بنسټونو د استادانو او محصلینو له لوري د ګډو علمي څېړنو ترسره کول، د کابل پوهنتون لپاره د ژب پيژندنې او ادب پېژندنې په برخه کې د ګډو ماسټري او دکتورا برنامو د زمینې برابرول، د ګډو علمي او څېړنیزو ناستو او غونډو جوړول، د دواړو لورو نړۍ والو علمي مقالو د چاپ زمینې برابرول، د دواړو لورو محصلینو لپاره د تحصیلي بورسیو برابرول او همدارنګه د یو بل له امکاناتو څخه په ګټه اخیستنه د دواړو بنسټونو د محصلینو لپاره د لنډمهاله عملي کارونو او ښونیزو دورو لپاره د زمینې برابرول دي.
د کابل پوهنتون رییس پوهاند دکتور محمد عثمان بابري او د انساني علومو او فرهنګي مطالعاتو د انسټیټوټ رییس دکتور حسین علي قبادي پدې غونډه کې، چې په انلاین ډول جوړه شوې وه، د دواړو هیوادونو تحصیلي بنسټونو ترمنځ د بنسټونو د بشري ظرفیت د لوړولو، د ګډو علمي او عملي تجربو څخه اغېزمنه ګټه په ځانګړې توګه د بنسټونو د پراختیا لپاره د زمینې برابرېدو په لحاظ یې یوه اړتیا وبلله او د دې هوکړه لیک په چوکاټ کې په مختلفو برخو کې د ډول- ډول علمي او څېړنیزو همکاریو په دوام یې تاکید وکړ.
