"د چاپېریالي پایښت، پېښو او طبیعي زېرمو مدیریت کنفرانس" سر ته ورسید
د کابل پوهنتون له لوري د چاپېریالي پايښت، پېښو او طبیعي زېرمو مدیریت تر عنوان لاندې یو ورځنی علمي-څېړنيز کنفرانس دائر شو.
په یاد کنفرانس کې د لوړو زده کړو وزارت او کابل پوهنتون رهبرۍ، د چاپېریال ساتنې ادارې عمومي رئیس، د ۱۴ امارتي او خصوصي پوهنتونونو استادانو، د ۱۳ ملي او نړیوالو مؤسسو استازو او محصلينو ګډون درلود.
ویناوالو د چاپېریال پر ارزښت خبرې وکړې، د چاپېریال او طبیعي زېرمو ساتنه یې د انساني ژوند د بقا لپاره مهمه وبلله.
د کنفرانس په لړ کې د استادانو له لوري د چاپېریال ساتنې، طبيعي زيرمو او پېښو مديريت اړوند ۲۴ علمي-څېړنیزې مقالې په درې تالارونو کې د منصفه هیئت په شتون کې وړاندې شوې، د هرې مقالې تر وړاندې کولو وروسته به ګډونوالو ته د بحث او مناقشې وخت ورکول کيده. په پای کې د ټولو مقالو او بحثونو څخه ترلاسه شوي عمومي او اهم نقاط د محيط زيست پوهنځي د رئيس لخوا راټول او د کنفرانس په ختامي مجلس کې وړاندې شول.
د دې کنفرانس ټولې علمي-څېړنيزې مقالې او د بحثونو نچوړ به، د ا.ا.ا د لوړو زده کړو وزارت له پاليسۍ سره سم، ټولو ذيربطو ادارو سره د تطبيق او استفادې په موخه شريک شي.
