د ټولنیزو علومو پوهنځي یو تن استاد له ۱۰۰۰ ټوکه څخه زیات کتابونه د یاد پوهنځي کتابتون ته ډالۍ کړل
د ټولنیزو علومو پوهنځي استاد پوهاند عصمت الله عثماني د ۱۰۰۰ ټوکه څخه زیات بېلا بېل تاریخي او علمي کتابونه د کابل پوهنتون دعلمي چارو مرستیال ښاغلي پوهاند محمدشفیع شریفي، پوهنځي رئیس او استادانو په شتون کې د یوې غونډې په ترڅ کې د پوهنځي کتابتون ته وسپارل.
د پوهنتون علمي چارو مرستیال په یاده غونډه کې د پوهاند عثماني صاحب نه د مننې او کوروداني ترڅنګ نوموړی عمل د ټولنیزو علومو پوهنځي او محصلینو په حق کې دده لویه پیرزوینه وبلله او هیله یې څرګنده کړه، چې نوموړې کړنه به د پوهنتون د نورو استادانو لپاره غوره بیلګه شي. پوهاند شریفي د پوهاند عثماني معنوي کړنه د ارزښت وړ او فوق العاده یاده کړه، نوموړي ته یې د اوږد عمر او نیکمرغې سلامتیا غوښتنه وکړه.
همدارنګه ښاغلي پوهاند عصمت الله عثماني د کتابونو د ډالۍ په غونډه کې د پوهنتون د علمي چارو مرستیال له ګډون څخه مننه وکړه او ددې کړنې څخه یې موخه د یاد کتابتون بډاینه او د کتابونو څخه د زده کړیالانو کټه اخیستنه یاده کړه او زیاته یې کړه نوموړي کتابونه بیلا بیل علمي او ښوونیز موضوعات لري، چې د مطالعه کوونکو لپاره به ګټور او اغیزمن تمام شي.
د ټولنیزو علومو پوهنځي رئیس ښاغلي پوهنمل محمد حسین احمدزي د پوهاند عثماني نوموړې کړنه غوره وبلله او ویې ویل چې استاد د ارزښت وړ او مهم کتابونه کتابتون ته وسپارل، چې ګټه اخیستونکو ته به ګټور تمام شي او موږ هیله لرو چې نور استادان هم په یاده کړنه کې مخکې شي.
