د ولایتونو او کابل اړونده ولسوالیو د متفرقه کانکور ازموینه واخیستل شوه
د ولایتونو او کابل اړونده ولسوالیو د کانکور متفرقه ازموینه د روان کال د تلې میاشتې په ۲۹ مه نېټه د جمعې ورځ په کابل پوهنتون کې په مناسب چاپېریال کې واخیستل شوه. پدې مناسبت جوړه شوې غونډه کې د کابل پوهنتون د علمي چارو مرستیال ښاغلي پوهاند محمد شفیع شریفي د کانکور د ازموینې نوماندانو ته د بریالیتوب هیله وکړه.
همدارنګه د ازموینو ملي ادارې مرستیال ښاغلي مولوي رحیم الله د ازموینې ګډونوالو ته د امتحان په اړه د شفافیت او عدالت ډاډ ورکړاو زیاته یې کړه چې د دوی هڅې به ضایع نشي.
د ولایتونو او کابل اړونده ولسوالیو په شمول تر ۶۰۰۰ / شپږ زره زیاتو نوماندانو په ازموینه کې برخه اخیستې وه چې لدې ډلې تر ۲۰۰۰ / دوه زره زیاتې ښځینه نوماندانې شاملې وې د ازموینې ملي ادارې د اعلان له مخې سږ کال به د ټول هېواد په کچه شاوخوا ۱۵۰ زره کسان د کانکور په ملي ازموینه کې ګډون وکړي چې ٪۳۵ سلنه یې ښځینه نوماندانې دي.
