د مشرانو جرګې د دیني او فرهنګي ( معارف، لوړو زده کړو او علمي څېړنو) کمیسیون رییس او غړو د کابل پوهنتون رهبري سره وکتل او د دې پوهنتون د لړم میاشتې دولسمې نېټې پېښې په هکله یې غمشریکي وکړه
د مشرانو جرګې د دیني او فرهنګي ( معارف، لوړو زده کړو او علمي څېړنو) کمیسیون غړو د کابل پوهنتون د عامه ادارې او پالیسي او د حقوقو او سیاسي علومو پوهنځيو یو شمېر محصلینو د شهادت په هکله، چې د لړم میاشتې دولسمې نېټې په پېښه کې شهیدان او یو شمېر نور تپیان شول د کابل پوهنتون له رهبري سره یې لیدنه او غمشریکي وکړه.
د سناتور عبداللطیف نهضتیار په مشري د دې کمیسیون غړو د لړم میاشتې په ۱۷ نېټه د شنبې په ورځ د کابل پوهنتون په ریاست کې د شهیدانو پاک روح ته دعا او د ټپیانو لپاره یې د روغتیا غوښتنه او د دوی له کورنيو او د کابل پوهنتون او د هیواد اکاډمیکې ټولنې سره یې غمشریکي او خواخوږي وکړه، د امنیتي مسوولینو له لوري د دې پېښې څارنې او د علت او عواملو دقیقې څېړنې، د دې پېښې څرنګوالي، د کابل پوهنتون له لوري د نویو درسونو دوام او د هیواد علمي ځایونو ساتنې په موخه د درې اړخیزو مشرانو جرګې، کابل پوهنتون او د هیواد امنیتي ادارو تر منځ په مشورتي ګډو ناستو باندې خبرې وکړې.
د کابل پوهنتون رییس پوهاند دکتور محمد عثمان بابري د دې کمیسیون غړو ته د ښه راغلاست ترڅنګ یې د لړم میاشتې دولسمې نېټې شهیدانو پاک روح ته دعا او د ټپیاو لپاره د روغتیا غوښتنه او د علمي ځایونو په ځانګړي توګه د کابل پوهنتون او د دې پوهنتون د محصلینو د امنیت په ساتلو باندې یې جدي تاکید وکړ او له دې سناتورانو څخه یې وغوښتل تر څو له امنیتي مسوولینو سره په خپلو مشورتي ناستو کې د پوهنتونونو او علمي ځایونو ته جدي پاملرنه ولري.
د دې ناستې غړو د دې لیدنې په پای کې د لړم میاشتې دولسمې نېټې پېښې ځای څخه لیدنه او له نژدې څخه یې د دې ځای ارزونه وکړه، چې اوس د ولسمشري ماڼۍ پراختیايي او عملیاتي واحد له لوري د زیانمن شوو ځایونو په بیارغونې باندې بوخت دي.
