د حقوقو پوهنځي محصلینو ته د مالیاتي قوانینو په اړه د پوهاوي سیمینار جوړ شو
دغه سیمینار د قران عظیم الشان د څو مبارکو آیاتونو په تلاوت سره پیل او ورپسې د مالیې وزارت کارکوونکو د حقوقو او سیاسي علومو پوهنځي محصلینو ته د مالیاتي قوانینو، طرزالعملونو، لارښوونو او سیستمونو په اړه معلومات او پوهاوی وړاندې کړ.
د مالیې وزارت د عوایدو ریاست عملیاتي مرستیال ښاغلي عبدالعلي نوري د خبرو په لړ کې محصلینو ته د هیواد په کچه د عوایدو د راټولولو ، حقوقي مسایلو او د هغې د اهمیت په اړه معلومات وړاندې کړل. وروسته د مالیې وزارت معین ښاغلي عبادالله درمل د محصلینو لپاره چمتو شوی پریزنټیشن وړاندې کړ، چې د دوی د پاملرنې وړ وګرځید.
دغه سیمینار د کابل پوهنتون د محصلانو چارو آمریت په همغږۍ جوړ شوی او په پام کې ده، چې په راتلونکي کې د نورو پوهنځیو د محصلینو لپاره هم په لاره واچول شي. د يادونې وړ ده، چې دغه سيمينار پخوا د اقتصاد پوهنځي د محصلينو لپاره هم جوړ شوى وو.
