د حضوري درسونو د پیل د تیاریو د ارزونې لپاره د کابل پوهنتون د رهبري شورا ناسته جوړه شوه
د کابل پوهنتون رهبري شورا ناسته د روان کال د چنګاښ په ۲۲ نېټه د سې شنبې په ورځ د کابل پوهنتون رییس او مرستیالانو او د دې شورا د نورو غړو په ګډون د پوهنتون د غونډو په مرکزي تالار کې جوړه شوه.
دا ناسته، چې د کابل پوهنتون رییس پوهاند دکتور محمد عثمان بابري په ریاست جوړه شوې وه، د غیر حضوري درسونو د پرمختګ په څرنګوالي، د کابل پوهنتون د جوړښت په چوکاټ کې د لیلیو ریاست جوړولو څرنګوالي، د ولسمشرۍ ماڼۍ د عملیاتي واحد له لوري د پوهنتون لنډ سکېپ پروژې د پلي کېدو بهیر، د بهرنیو احتمالي دخالتونو پر وړاندې د پوهنتون د خپلواکۍ څخه ساتنه، د اختر تر رخصتیو وروسته د حضوري زده کړو لپاره د پوهنځیو تیاري او ... موضوعاتو باندې خبرې وشوې.
په دې ناسته کې د رهبري شورا د حاضرو غړو د بحث او نظرونو وروسته، چې په هغو کې د ټولو پوهنځیو رییسانو د پورته موضوعاتو په اړه راپورونه، وړاندیزونه او نظریات وړاندې کړل، په مختلفو موضوعاتو یې اړین تصمیم ونیول شو او د هغې له ډلې څخه یې پرېکړه وکړه، چې د روان سمسټر د درسونو د غوره پلي کېدو، د کرونا ویروس د خپرېدو له امله د قرنطینه دورې په پای سره، د روغتیايي لارښوونو په پام کې نیولو سره د لسو اوونیو لپاره زده کړې د استادانو او ګرانو محصلینو له لوري په حضوري ډول تر سره شي او د حضوري زده کړو لپاره یې په زیاتو تیارو تاکید وکړ.
