د تیکا مؤسسې رئیس د کابل پوهنتون له رئیس سره لیدنه تر سره کړه
ښاغلي فاضل آکین "اردوغان" چې په کابل کې د تیکا مؤسسې د نوي رئیس په توګه ټاکل شوی، د کابل پوهنتون څخه د لیدنې پر مهال د دغه پوهنتون له رئیس ښاغلي دکتور اسامه عزیز سره د پوهنتون د مرستیالانو په شتون کې لیدنه تر سره کړه.
پدې لیدنه کې د افغانستان او ترکیې ترمنځ د اړیکو، دوستۍ، د کابل پوهنتون او ترکیې هېواد د پوهنتونونو ترمنځ د علمي او اکاډمیکو همکاریو پر پیاوړتیا، له کابل پوهنتون سره د تیکا مؤسسې پر مرستو او د دغو مرستو پر دوام خبرې وشوې او دواړو لورو د اړیکو او همکاریو پر لا پیاوړتیا ټینګار وکړ.
د تیکا مؤسسې رئیس د کابل پوهنتون له رئیس سره تر لیدنې وروسته له هغه څېړنیزې باغچې څخه چې ددغه مؤسسې لخوا د کابل پوهنتون لپاره جوړه شوې او همدارنګه د سید جمال الدین افغان له مقبرې څخه لیدنه او ژمنه یې وکړه چې د دغه څېړنیزې باغچې د وسایلو او امکاناتو په لا غني کولو کې به همکاري وکړي.