د کابل پوهنتون رئیس د فارمسي پوهنځي په میني لب کې د درملو د کیفیت د ارزونې له بهیره لیدنه وکړه
د کابل پوهنتون رئیس ښاغلي دکتور اسامه عزیز او مرستیالانو یې د روان کال د تلې میاشتې په ۱۳ مه نېټه د چهارشنبې په ورځ د محصلینو د روزنې او د درملو د کیفیت ارزونې د دریم دور/ پړاو له بهیر څخه د فارمسي پوهنځي په میني لب کې لیدنه تر سره کړه.
پدې کتنه کې د پوهنتون رئیس د عملي کارونو په تر سره کولو کې د فارمسي پوهنځي د رهبرۍ له هڅو او زیار څخه د مننې او قدرداني په ترڅ کې محصلینو ته په خطاب کې وویل، چې په ارامه او پوره ذهن سره زده کړې وکړي او خپلو عملي کارونو ته پام وکړي. ځکه د پوهنتون رهبري په پوره اخلاص د دوی خدمت کوي. دکتور عزیز عملي کارونه د محصلینو لپاره مهم او ګټور وبلل او زیاته یې کړه، چې په عملي کار کې نظري مسایل په عمل کې لیدل کېږي، چې د محصلینو لپاره ګټور تمامېږي.
د فارمسي پوهنځي محصلانو هم د خپل عملي کار په ترڅ کې د پوهنتون د مشرتابه له شتون څخه هر کلی وکړ او د پوهنځي په میني لب کې یې د درملو د کیفیت د ازموینې او ارزونې بهیر په تفصیل سره بیان کړ، چې د پوهنتون د مشرتابه لخوا یې ستاینه وشوه. پدې پروګرام کې یو تن ګډونوال محصل ټینګار وکړ چې دوی له عملي کارونو سره علاقه لري ځکه چې ډېر څه ترېنه زده کولای شي.
د درملو د کیفیت د ارزونې په دریم دور/ پړاو کې ۱۹ قلمه درمل د ۲۲۰ نمونو په ګډون چې د مرکز او ولایتونو له ۳۳ روغتونونو څخه را ټولې شوې . دا دور/ پړاو دری اونۍ وخت نیسي او د ارزونې راپور او پایلې به یې وروسته ارائه شي.
د یادونې وړ ده چې د کابل پوهنتون د فارمسي پوهنځي د درملو د کیفیت د ارزونې په برخه کې هر اړخیزه همکاري کوي. په ځانګړي توګه د درملو او خوراکي توکو له ملي ادارې سره له بهر څخه د وارد شوو درملو په ارزونه کې مرسته کوي.
