د کابل پوهنتون رییس د پوهنوال محمد عظیم حسین زاده هنر مندي ورکشاپ پرانیستې او له دې ورکشاپ څخه د شورايي تیاتر زده کونکو فراغت مراسمو کې ګډون وکړ
د ښکلو هنرونو پوهنځي پخواني استاد پوهنوال محمد عظیم حسین زاده د هنرمندي ورکشاپ پرانیستې او د شورايي تیاتر زده کړه ييز ورکشاپ څخه د محصلینو فراغت اوومې دورې مراسم د روان کال د غبرګولي په ۴ نېټه د کابل پوهنتون د ښکلو هنرونو پوهنځي کې د کابل پوهنتون د رییس پوهاند دکتور محمد عثمان بابري، د ښکلو هنرونو پوهنځي رییس، استادانو او محصلینو په ګډون جوړ شو.
د کابل پوهنتون رییس پوهاند دکتور محمد عثمان بابري د دې غونډې په پیل کې یې د مرحوم پوهنوال استاد محمد عظیم حسین زاده د هنرمندي ورکشاپ پرانیستې لپاره یې د ښکلو هنرونو پوهنځي رهبري څخه د مننې او همدارنګه د شورايي تیاتر ورکشاپ څخه د محصلینو فراغت د مبارکي ترڅنګ یې وویل، چې د علمي او اکاډمیکو څېرو په یاد د هنري او فرهنګي ورکشاپونو جوړول یو نیک او غوره کار دی او پدې برخه کې د کابل پوهنتون رهبري مو همکاره او ملاتړ کوونکې ده. پوهاند بابري زیاته کړه، چې په ژوند کې هنري تیاتر مهم دی او په مختلفو برخو کې، چې د هنرمندانو له لوري هنري کارونه وړاندې کیږي کولای شو الهام واخلو او د فکر کولو لاره پکې ولټوو. د کابل پوهنتون رییس وویل د ښکلو هنرونو پوهنځي په وروستیو شلو کلونو کې مثبت پرمختګ کړی دی او دا په پوهنتون کې يوه ښه بېلګه ده. پوهاند بابري همدارنګه د پوهنتون له استادانو او محصلینو څخه وغوښتل، چې پدې ملي بنسټ کې د مثبت او اکاډمیک بدلون په برخه کې همکار او ملګري واوسي.
له بل لوري د ښکلو هنرونو پوهنځي رییس پوهنمل سمیع الله نبي پور د کابل پوهنتون د رییس په ورتګ خوښي وښوده ویې ویل، چې د ښکلو هنرونو پوهنځی د ملي او انساني ارزښتونو د خلق په لوري ګامونه پورته کوي او دا خپله دنده ګڼي تر څو له خپلو ملي څېرو او علمي او اکاډمیکو بنسټونو څخه ستاینه وکړي. ښاغلي نبي پور زیاته کړه، چې د استاد محمد عظیم حسین زاده او د هغه د غوره کارونو ځای تل خالي دی او هېڅ وخت به هېر نشي. د ښکلو هنرونو پوهنځي رییس د ښوونیز او هنري ورکشاپ جوړېدل مهم وبلل تاکید یې وکړ، چې دوی د کابل پوهنتون رهبري سره په پوره همغږۍ او همفکري د دې علمي ځای د بدلون او تغییر لپاره به هڅه وکړي.
د یادونې وړ ده، چې د شورايي تیاتر ښونیز ورکشاپ په افغانستان کې د سولې لپاره د مدني خدمتونو (GIZ) دفتر په مرسته او همکاري جوړ شوی وو او دا ورکشاپ د ښکلو هنرونو پوهنځي د دویم ټولګي محصلینو له لوري د څلورو نندارو په تر سره کولو سره پایته ورسېد.
