د کابل پوهنتون مرکزي کتابتون سره د اووه سوه ټوکه کتابونو مرسته وشوه
دغه کتابونه چې په بېلا بېلو علمي او اکاډمیک برخو او مضامینو کې دي، د اقتصاد پوهنځي یو تن محصل لخوا د یوې جوړې شوې غونډې په ترڅ کې چې د پوهنتون مالي او اداري مرستیال ښاغلي مولوي معلم احمد حقاني، د پوهنتون د مرکزي کتابتون آمر، د محصلانو د خدمتونو د انسجام آمر، د پوهنتون استادانو او کارمندانو په کې ګډون درلود کتابخانې ته وسپارل شول.
د پوهنتون مالي او اداري مرستیال، د اقتصاد پوهنځي له دغه محصل څخه مننه وکړه او د محصل دغه کړنه یې د پوهنتون لپاره د قدر او ویاړ وړ نوښت وباله، او زیاته یې کړه چې د پوهنتون رهبري د محصل یاده کړنه د ستاینې او تقدیر وړ بولي. او باید دغه شان معنوي کړنې دوام ومومي، ځکه دغه شان کړنې د محصلینو د لا هڅونو سبب کېږي.
همدا مهال د اقتصاد پوهنځي محصل امید کریمي چې د دغو کتابونو مرسته یې کړې وه، وایي چې په ډېر زیار یې له بېلا بېلو علمي ځایونو کتابونه راټول کړي او موخه یې دا وه چې محصلین دغه ډول معنوي کړنو او د کتاب مطالعې ته وهڅوي چې په راتلونکي کې به هم پدې لاره کې هڅه وکړي.
همدا ډول د پوهنتون د مرکزي کتابتون آمر حبیب الله لمر، له ښاغلي کریمي څخه د مننې تر څنګ د یاد شمېر کتابونو وړاندې کول د کتابتون په بډایه کولو کې ګټور او اغېزمن ګام یاد کړ.
