د کابل پوهنتون د داخلي شبکې (LAN) په اساسي او معياري ډول جوړولو چارې رسما پيل شوې!
د کابل پوهنتون او افغان ټيلي کام مخابراتي شرکت ترمنځ د ترسره شوي هوکړه ليک په اساس د روان کال د وري مياشتې په ١٠ نېټه د ياد پوهنتون د داخلي شبکې په اساسي او معياري ډول جوړولو چارې رسما پيل شوې.
د کابل پوهنتون د معلوماتي ټکنالوژي سرپرست آمر ښاغلي انجينر صبغت الله رحمتزي د يادې پروژې د پرانستې په مراسمو کې وويل چې د کابل پوهنتون موجوده داخلي شبکه غير معياري او د زياتو ستونزو درلودونکې ده نو له همدې امله مو د يادې شبکې د معياري کولو په موخه نقشه جوړه او د عملي کولو په موخه مو د افغان ټيلي کام مخابراتي شرکت سره د څه باندې یو مېلیون او څلور لکه افغانیو په بدل کې هوکړه ليک لاسليک کړ چې لله الحمد نن يې چارې عملا پيل شوې.
ښاغلي رحمتزي زياته کړه چې د يادې پروژي چارې به د يوې مياشتې په جريان کې بشپړې چې په تطبيق او ګټې اخيستنې سره به يې په ټول پوهنتون کې د انټرنټ د سرعت ستونزه حل او هره پوهنځۍ او څانګه به په مستقل ډول د معلوماتي ټکنالوژي آمريت سره وصل شي.
