د کابل پوهنتون د امنیتي کمېټې ناسته جوړه شوه
د روان کال د وري په ۱۶ نېټه د دوشنبې په ورځ د کابل پوهنتون د امنیتي کمېټې ناسته د کابل پوهنتون د رییس پوهاند دکتور محمد عثمان بابري، د محصلینو چارو معاونیت، د امنیتي کمېټې غړو، د کابل ښار د درېمې امنیتي حوزې امر او د کابل پوهنتون د امنیتي مسوولینو په ګډون د علمي شورا په ناستو کې جوړه شوه.
د ناستې په پیل کې د کابل پوهنتون رییس د جلسې غړو ته ښه راغلاست وویل او لارښوونکې خبرې وکړې او د دې پوهنتون د امنیت تامین یې د محصلینو او مراجعینو لپاره یو مهم او حیاتي امر وباله او د هغه په ښه والي یې تاکید وکړ. پوهاند بابري زیاته کړه، چې د کابل پوهنتون د غوره امنیت د تامین لپاره کارونه تر سره شوي دي او راتلونکی بل پلان هم تر لاس لاندې دی تر څو کابل پوهنتون زیات پیاوړی شي او محصلین او استادان بې له وېرې څخه خپلو زده کړو او تدریس ته دوام ورکړي. همدارنګه د کابل پوهنتون رییس له امنیتي مسوولینو څخه وغوښتل، چې د کابل پوهنتون د امنیت د تامین په برخه کې د قانون په رڼا او سم شکل سره تر سره کړي ترڅو امنیتي نیمګړتیاوې لرې شي.
امنیتي مسوولینو د کابل پوهنتون امنیتي کمېټې ناسته کې وعده وکړه، چې د دې پوهنتون سره له نژدې همکاري د دې پوهنتون د امنیت لپاره په ټول توان او تلاش هڅه او کار کوي او دا دوی اصلي دنده ده.
کابل پوهنتون په اوس وخت کې ۲۲ پوهنځي او ۲۶ زرو په شاوخوا کې د لسانس، ماسټري او دکتورا دورو محصلین لري او د دومره جمعیت لرونکي ځای د امنیت تامین د پوهنتون د رهبري او د هیواد د امنیتي سکتور د برنامو په سر کې ځای لري.
