د مرکزي زون پوهنتونونو د اسلامي ثقافت مضمون له نوماندانو څخه تخصصي ازموینه واخیستل شوه
د روان کال د میزان میاشتې په ۶ نېټه د دوشنبې ورځ د مرکزي زون پوهنتونونو د اسلامي ثقافت مضمون له نوماندانو څخه د کابل پوهنتون د شرعیاتو پوهنځي کې تخصصي ازموینه واخیستل شوه.
ددغه ازموینې د جریان څخه د لوړو زده کړو وزات علمي معین ښاغلي لطف الله خیر خواه او د کابل پوهنتون رئیس ښاغلي دکتور اسامه عزیز لیدنه او نظارت ترسره کړ.
پدغه ازموینه کې ۳۰ تنه نارینه او ۳۱ تنه ښځینه نوماندانو ګډون کړی وو د مسؤلینو په وینا هغه نوماندان چې په تخصصي ازموینه کې بریالي شي تقریري ازموینې ته لار پیداکوي.
د یادونې وړ ده چې له یادو نوماندانو څخه د عربي ژبې ازموینه یوه ورځ مخکې د کمپیوترساینس پوهنځي کې په کمپیوتري ډول اخیستل شوې وه.
د مرکزي زون پوهنتونونه د کابل، پولي تخنیک، طبی، ښوونې او روزنې، البیرونې، پروان، پنجشېر، میدان وردګ، بامیان او غزني له پوهنتونونو څخه عبارت دي.
د یادونې وړ ده چې په همدې ورځ د پکتیا او پکتیکا پوهنتونونو د اسلامي ثقافت مضمون د نوماندانو څخه هم د کابل پوهنتون په شرعیاتو پوهنځي کې تخصصي ازموینه واخیستل شوه.
