د محصلینو لپاره ۱۵ ورځینی فکري او روزنیز سمینار پای ته ورسېد
په دې سمینار کې د مرکزي حوزې له پوهنتونو څخه له (۳۰۰) تنو څخه زیاتو محصلینو ګډون کړی وو او همدارنګه نوموتو علماوو لخوا د ۱۵ ورځو په لړ کې هغوی ته مهم دیني، عقیدتي، فکري، او اصلاحي مسایل تدریس شول.
د دې مراسمو په پای کې د کابل پوهنتون رهبري د لوړو زده کړو وزارت رهبري او د هېواد نوموتو دیني علماوو ګډون کړی وو.
د کابل پوهنتون رئیس دکتور اسامه عزیز د محصلینو دیني او ملي مسؤلیتونو په اړه خبرې وکړې او له هغوی یې وغوښتل، هغه څه چې په یاد سمینار کې زده کړي له نورو سره هم شریک کړي.
د لوړو زده کړو وزارت سرپرست ښاغلي شیخ مولوي نداء محمد ندیم نوموړی سمینار د محصلینو لپاره ګټور او ضروري یاد کړ، تر څو له دې لارې ددوی اسلامي او اخلاقي معلومات زیات شي او د نورو لپاره لارښوونکي شي. نوموړي هیله څرګنده کړه، چې محصلین له دې سمینار څخه غوره او اغېزمنه ګټه واخلي. په دې سمینار کې پر محصلینو تصدیق پاڼې هم وویشل شوې.
