د ممتازو محصلینو ستاینغونډه ترسره شوه
د کابل پوهنتون د ۱۴۰۳ لمریز کال غوره او ممتاز محصلین د چین هېواد د سفارت په همکارۍ په نغدي جوایزو او د ستاینلیکونو په ورکړې سره وستایل شول.
په دې تړاو جوړو شویو مراسمو کې د چین هېواد سفیر او ورسره مل پلاوي، د لوړو زده کړو وزارت د امارتي محصلانو او د خدماتو د انسجام رئيسانو، د کابل پوهنتون رهبري، استادانو او محصلینو برخه درلوده.
د کابل پوهنتون رئیس دوکتور اسامه عزیز د ښه راغلاست او پرانیستې وینا پر مهال وویل، د چین او افغانستان سیاسي، اقتصادي، فرهنګي او علمي روابط په دې وروستیوو کې په ښه لور روان دي، له چین هېواد څخه مننه کوو چې د تل په څېر یې د ممتازو او مستحقو محصلینو په هڅونې او ملاتړ کې فعاله برخه اخیستې، هيله مو دا ده چې چین هېواد د کابل پوهنتون او په لویه کې د افغانستان له پوهنتونونو سره د انجینرۍ، ټکنالوژي، ساینس او نورو مهو برخو کې خپلې علمي تجربې شریکې کړي.
ورپسې د چین هېواد سفیر ښاغلي جاو شینګ په خپلو خبرو کې وویل، موږ ژمن یو چې د کابل پوهنتون محصلینو سره خپلو همکاریو او مرستو ته دوام ورکړو، موږ به له افغانستان سره خپلو اقتصادي، فرهنګي او علمي اړیکو ته لا ډېره پیاوړتیا ورکړو.
په دې غونډه کې د کابل پوهنتون شپيته تنه مستحق او ممتاز محصلين په نقدي جوائزو وستايل شول.
