د افغانستان پر ځان بساینې لپاره نړیوال زرغون انقلاب کنفرانس د پیژندنې لومړۍ غونډه ترسره شوه
د روان کال وږي میاشتې په ۲۲ نېټه د چهارشنبې د کرنې په برخه کې د افغانستان پرځان بساینې لپاره د نړیوال زرغون انقلاب کنفرانس د پېژندنې لومړنۍ غونډه چې په پام کې ده د روان کال په پای کې د کابل پوهنتون لخوا جوړ شي ترسره شوه.
په یاده غونډه کې د لوړو زده کړو وزارت علمي مرسیتال، د کابل پوهنتون رهبرۍ، د خصوصي پوهنتونو او خصوصی سکتورو استازو، د خصوصي سکتور مالدارۍ او کرنیزو محصولاتو خونې رئیس، د اصلاح شوي تخمونو اتحادېې استازي، د آغاخان بنسټ استازي، د IRC موسسې استازي، د پوهنځيو رئیسانو او محصلینو پکې برخه اخیستې وه.
ددې کنفرانس د پېژندنې اساسي موخه د کرنې په برخه کې د افغانستان پرځان بساینې لپاره د نړیوال زرغون انقلاب جزیاتو پېژندنې تر څنګ د یاد کنفرانس د ژر ترسره کېدو لپاره د شریکانو او ملاتړو د نظرونو وړاندې کول وو.
د کابل پوهنتون رئیس ښاغلي دکتور اسامه عزیز د یاد کنفرانس په پیل کې خبرې وکړې او لوړو زده کړو وزارت علمي معینیت او د خصوصي برخو له ګدونوالو څخه یې مننه وکړه. نوموړي د کرنې په برخه کې د افغانستان پرځان د بساینې لپاره د نړیوال زرغون انقلاب کنفرانس خورا مهم یاد کړ او له متخصصینو، کارپوهانو، د پوهنتون استادانو او له ښکېلو خواوو یې وغوښتل چې په دې برخه کې د کابل پوهنتون سره خپل مسلکي نظرونه شریک کړي.
د لوړو زده کړو وزارت علمي مرستیال ښاغلي دکتور لطف الله خیر خواه د ټولنې اړینو مسائلو لپاره د متخصصینو او استادانو راټولېدل، مشوره ورکول او نظرونه وړاندې کول د علمي پرمختګ نښانه یاده کړه او ټینګاریې وکړ چې په دې کنفرانس کې به بهرني کارپوهان او استادان هم برخه واخلي او باید د هغه په اړه پوره غور وشي.
د پېژندنې په یاده غونډه کې د کرنې پوهنځي رئیس ښاغلي صفی الله جوهر د پرزنتشن په وړاندې کولو سره د کرنې په برخه کې د افغانستان پرځان بساینې لپاره د نړیوال زرغون انقلاب کنفرانس په پېژندنه، موخو او جزیاتو خبرې وکړې. ګډونوالو د زرغون انقلاب کنفرانس په اړه خپل نظرونه، وړاندیزونه او پوښتنې مطرح کړې چې د ګډونوالو د پام وړ وګرځېدې.
