د کابل پوهنتون د ۱۴۰۰ کال د یو شمېر متقاعدینو استادانو له کارونو او خدمتونو څخه د کابل پوهنتون رهبري ستاینه وکړه
کابل پوهنتون رهبري د روان کال د وري په ۲۳ نېټه د دوشنبې په ورځ د ۱۴۰۰ کال د ۱۲ متقاعدو استادانو او یوکارمند له کړنو او خدمتونو څخه د یوې غونډې په لړ کې په داسې حال کې، چې د یو شمېر پوهنځیو رییسانو او استادانو شتون درلود ستاینه وکړه.
د کابل پوهنتون رییس پوهاند دکتور محمد عثمان بابري د غونډې په پیل کې د دې پوهنتون د متقاعادو استادانو او یو کارمند له علمي او اکاډمیکو کړنو څخه د ستاینې ترڅنګ یې دوی ته وویل: «تاسو په زیاتو سختو شرایطو کې دې پوهنتون کې کار کړی او د هیواد اولاد مو روزلی دی، چې دا ستاسو ريښتینولي او وطن دوستي ده، د کابل پوهنتون رهبري به هیڅ وخت ستاسو دا خدمتونه هېر نکړي. »
د کابل پوهنتون د رییس په وینا د استادانو او د علمي کادر د غړو د تقاعد سن د اوسني قانون مطابق سخت دي، پدې برخه کې باید تامل وشي او د علمي کادر غړو قانون باید بدلون ومومي. پوهاند بابري د خپلو خبرو په یوې برخه کې په تاکیدي ډول وویل، چې د کابل پوهنتون علمي شورا «د متقاعدو استادانو علمي او اکاډمیک طرفیتونو څخه د ګټې اخیستنې طرزالعمل» یې تصویب کړی او د دې طرزالعمل مطابق په علمي او اکاډمیکو برخو کې د متقاعد شوو استادانو له ظرفیت څخه به ګټه پورته کوي.
د کابل پوهنتون د کیمیا پوهنځي رییس پوهندوی دکتور احمد مسعود منصوري د دې پوهنتون د رییسانو په استازیتوب پدې غونډه کې خبرې وکړې او د دې استادانو له ګټو، ښو اخلاقو او خوږو خاطرو څخه یادونه وکړه. دکتور منصوري په خپلو خبرو کې وویل: «د ویاړ ځای دی، چې د لومړي ځل لپاره په کابل پوهنتون کې د پوهنتون د رهبري په نوښت د متقاعدو استادانو څخه د ستاینې په موخه يو ښه محفل جوړیږي، چې خپل زیات کلونه یې د هیواد اولاد ته وقف کړي دي او دا د استاد لوړ مقام ته د درناوي په مانا دی.»
پدې غونډه کې د متقاعدو استادانو په استازیتوب پوهاند دکتور غلام حبیب پنجشیري خبرې وکړې او د دې غونډې په جوړېدو د خوښي ښودو ترڅنګ وویل: «مونږ وعده کوو، چې په خپله ټینګه اراده خپلو څېړنو، تالیف او ترجمې ته دوام ورکوو او د لوړو زده کړو بنسټونو یې په پیدایښت کې زمینه برابره کړې ده او پوهنتون خپل کور او کارکوونکي به یې د کورنۍ غړي وشمېرو.»
د کابل پوهنتون علمي مرستیال پوهاند دکتور محمد شفیع شریفي هم د متقاعدو استادانو او کارمندانو ارزښتمندو کړنو څخه ستاینه وکړه او ویې ویل، چې د پوهنتون اوسنۍ وضعیت د مخکینیو استادانو، چې اوس یې تقاعد کړی دی احسانمند دی او مونږ دا زحمتونه هېڅ وخت نه هېروو.
دا غونډه د کابل پوهنتون متقاعدو استادانو او يو کارمند ته د ستاینلیکونو او ډاليو پر ورکړه پایته ورسېده.
