د کابل پوهنتون رییس د پوهنتون د ۴۰ تدریسي ټولګیو او ۱۵۰۰ کسیزو غونډو تالار د ودانیز کار بهیر څخه لیدنه وکړه
د روان ۱۳۹۹ د کب په ۱۷ نېټه د یکشنبې په ورځ د کابل پوهنتون رییس پوهاند دکتور محمد عثمان بابري په داسې حال کې، چې د دې ودانیزې پروژې اجرايي مدیر ښاغلي لي او همدارنګه د پوهنتون د اداري برخې همکارانو شتون درلود، د ۴۰ تدریسي ټولګیو او ۱۵۰۰ کسیزو غونډو تالار د ودانیز کار له بهیر څخه، چې د یو چینايي شرکت له لوري جوړیږي لیدنه او د دې پروژې د کاري بهیر ارزونه یې وکړه.
دا ودانۍ، چې د کیمیا پوهنځي لویدیځه برخه کې په ۱۸۹۰۰ متره مربع مساحت، چې په ۱۴۱۰۰ متره مربع سیمه کې د جوړېدو په حال کې ده، د انجنیري معیارونو په نظر کې نیولو سره طرحه شوې، چې د غونډو تالار د ګرمېدو، روغتیا او تخنیکي سیسټمونو سره په یو وخت کې د ۱۵۰۰ کسانو د ظرفیت درلودونکې ده او تدریسي ودانۍ یې په څلور پوړونو کې د ۴۰ تدریسي او اداري خونې په لرلو سره جوړه شوې ده.
دا پروژه په ۱۳۹۶ د تلې په ۱۸ نېټه د چین خلق جمهوریت په مالي مرسته په اته دېرش میلیونه او څلور سوه او شپېته زره امریکايي ډالرو په لګښت د چینايي شرکت MCC19 له لوري پیل شوې، چې ژر به پای ته ورسیږي او راتلونکي کال کې به د کابل پوهنتون لپاره د ګټې اخیستنې په موخه په واک کې ورکړل شي.
