د کابل پوهنتون ستراتیژیک پلان
بسم الله الرحمن الرحیم
سریزه:
کابل پوهنتون د تأسیس کال څخه تر دې دمه له ډېرو لوړو ژورو سره همهاله د ټولنې علمي اړتیاوو ته د ځواب ویلو، د معیاري پوهې د تولید او خپرولو برخو کې فعال نقش لري. د پوهنتون رهبرۍ د ستراتیژیک پلان کمېټې سره د همکارۍ په موخه له ۱۴۰۱ تر ۱۴۰۵ لمریز کال پورې "ستراتیژیک پلان” تدوین کړی. په دغه پلان کې د اسلامي احکامو، ملي مصالحو او لوړو زده کړو وزارت اهدافو په رڼا کې د لید لوري، مأموریت، ارزښتونو، اهدافو، د داخلي او بهرنیو عواملو تحلیل، د ستراتیژیو جوړښت او انتخاب او په پای کې عملیاتي پلان او د څارنې او ارزونې مکانیزم شامل دي چې د ټولنې غوښتنو ته د مؤثر ځواب ویلو زمینه برابره کړي.
لیدلوری او مأموریت
کابل پوهنتون په پام کې لري چې د تعلیم، څېړنې، تحصیلي خدمتونو برابرولو او عملي علم د ترویج له لارې له نړیوالو معیارونو سره سم د تخصصي او مسلکي علم د تولید او انکشاف برخو کې په ملي او نړیواله کچه د یو معتبر علمي نهاد په توګه لا زیات وځلیږي.
کابل پوهنتون له نویو امکاناتو او عصري تکنالوژۍ څخه په ګټې اخیستنې د تعلیمي، تحصیلي، علمي- څېړنیزو خدمتونو په وړاندې کولو د باثباته انکشاف، د تخصصي او مسلکي کادرونو روزنې او د ټولنې د اړتیاوو برابر څېړنو په ترسره کولو سره په ملي او نړیواله کچه د هېواد د لومړني پوهنتون په حیث پېژندل کیږي.
اساسي ارزښتونه
- د اسلامي احکامو او ملي ارزښتونو پیروي او ساتنه کول؛
- د علم په خپراوي سره د ټولنې اړتیاوو ته ځواب ویل؛
- په نړیواله کچه علمي مقبولیت لرل؛
- باکیفیته روزنیز،څېړنیز، تخنیکي او مشورتي خدمتونه وړاندې کول؛
- د علمي سیالۍ روحیه پياوړې کول؛
- د نړیوالو علمي- څېړنیزو همکاریو پراختیا؛
- محصلینو سره دوامداره او هدفمندې اړیکې ساتل؛
- د علمي نوښت او خلاقیت روحیه پېاوړې کول.
ستراتیژیک اهداف
- د علمي- څېړنو انکشاف، د پوهې تولید او نوښت؛
- د رهبرۍ او ادارې غوره والی، د مؤثرو اداري سیستمونو رامنځته کول او له فساد سره مبارزه؛
- د مختلفو تحصیلي دورو د نصاب تدوین، انکشاف او کره کتنه؛
- د کیفیت لوړول، په ملي او نړیواله کچه د اکادمیک اعتبار ساتنه؛
- د بریښنایي زده کړو پراختیا او ښه والی؛
- د زیربناو انکشاف او ښه والی؛
- د علمي کادر غړو، کار کوونکو او محصلینو ظرفیت لوړول؛
- د علمي- څېړنیزو برنامو او پالیسیو کره کتنه؛
- په ملي، منطقه یي او نړیواله کچه له علمي- فرهنګی مرکزونو سره د همکارۍ د پرمختګ زمینه برابرول؛
- د تحصیلي چاپېریال انکشاف، ښه والی او محصلینو ته د خدمتونو ارائیه کول.
ستراتیژیانې:
- په کابل پوهنتون کې د ټولو اسلامي او اداري اصولو پلي کېدل؛
- کابل پوهنتون ته د کانکور د ممتازو نوماندانو د جذب زمینه برابرول؛
- د ټولنې د اړتیاوو سره سم د مسلکي-تخصصي روزنې په موخه د ماسترۍ او دوکتورا برنامو رامنځته کول او پراختیا؛
- د څېړنیزو مرکزونو رامنځته کول، د ملي او نړیوالو علمي څېړنو وده او پراختیا؛
- له مختلفو موډلونو څخه په استفادې سره د تحصیلي نصاب پراختیا او کابل پوهنتون د هېواد، سیمې او نړۍ د معتبر علمي بنسټ په توګه ځلول؛
- داستاد او محصل د (۱.۲۵) نسبت له مخې له کمي او کیفي طرز سره سم د علمي کادر اعضاوو پیاوړتیا؛
- د کابل پوهنتون د سکالرشیپونو له لارې د بیرونیو محصلینو د جذب زمینې د آسانتیا په موخه په ملي او نړیوالو ژبو د تحصیلي خدمتونو وړاندې کول؛
- د اسلامي او ملي لویو پالیسیو د تدوین په موخه د ټولنې له اړتیاوو سره سم په مختلفو علمي حوزو کې د څېړنیزو ټیمونو رامنځته کول؛
- د کابل پوهنتون د ټولو کارمندانو ترمنځ د همغږۍ او خواخوږۍ د رامنځته کولو اړوند فرهنګي- ټولنیزو برنامو ته خاصه پاملرنه کول او په پای کې د هېواد د ټولو قشرونو او صنفونو ترمنځ د همغږۍ او خواخوږۍ فضا رامنځته کول؛
- پوهنتونونو ته په شفاف او عادلانه ډول د نوو علمي کادر غړو د جذب زمینه برابرول؛
- د کریډیټ سیستم د تطبیق پروسې له مخې د ننګونو او ستونزو تشخیص او ددې سیستم د غوره کارونې په موخه له معیاري نمونو څخه استفاده کول.