د پوهاند دوکتور ودیر صافي د وفات په هکله د کابل پوهنتون د تسلیت پیغام
《كُلُّ نَفۡسٖ ذَآئِقَةُ ٱلۡمَوۡتِۗ وَإِنَّمَا تُوَفَّوۡنَ أُجُورَكُمۡ يَوۡمَ ٱلۡقِيَٰمَةِۖ فَمَن زُحۡزِحَ عَنِ ٱلنَّارِ وَأُدۡخِلَ ٱلۡجَنَّةَ فَقَدۡ فَازَۗ وَمَا ٱلۡحَيَوٰةُ ٱلدُّنۡيَآ إِلَّا مَتَٰعُ ٱلۡغُرُورِ》[آل عمران: ١٨٥]
په ژورې خواشینۍ سره مو خبر تر لاسه کړ، چې د کابل پوهنتون مشر استاد پوهاند دوکتور ودیر صافي د ورپېښې ناروغۍ له امله له دې نړۍ سترګې پټې کړې.
ارواښاد پوهاند دوکتور صافی د افغانستان د علمي او اکاډمیک بهیر له مهمو شخصیتونو څخه وو، د ژوند څو لسیزې یې د لوړو زده کړو د ودې، علمي نوښتونو، څېړنو او د حقوقو او سیاست په ډګر کې د هېواد د ځوان نسل د مسلکي روزنې لپاره وقف کړې وې. په تير يوه کال کې د صحی ستونزو له زياتيدو سره سره يې خپلې علمي او تدريسي چارې په اخلاص او تعهد سره پرمخ وړلې.
د پوهاند صافي نشتون به د هېواد په علمي ډګر کې ژوره تشه وي، خو علمي قشر ته يې علمي میراث، لیکنې، څېړنې، او هڅانده شاګردان په ميراث پريښودل، چې د افغانستان د اکاډمیک ډګر یوه ارزښتناکه پانګه جوړوي. الله تعالی دې د ارواښاد دا علمي هڅې قبولې کړي.
د کابل پوهنتون مشرتابه او استادان، د نوموړي له کورنۍ سره په دې غم کې ځان شریک بولي او تسلیت وړاندې کوي، د الله جل جلاله له دربار څخه ارواښاد ته د مغفرت او فردوس جنت غوښتنه کوي، او کورنۍ ته یې صبر جميل غواړي.
انا لله و انا الیه راجعون
