د کابل پوهنتون رییس په خپل دفتر کې د قزاقستان له سفیر سره وکتل
د کابل پوهنتون رییس پوهاند دکتور محمد عثمان بابري په داسې حال کې، چې د دې پوهنتون مرستیالانو هم شتون درلود په کابل کې د قزاقستان جمهوريت سفیر عالم خان یاسین ګیلدیف او مل پلاوي سره وکتل. دا لیدنه، چې د روان کال د وري په ۱۸ نېټه تر سره شوه د افغانستان او قزاقستان ترمنځ د اکاډمیکو اړیکو په زیاتوالي په ځانګړې د کابل پوهنتون او د قزاقستان جمهوریت د پوهنتونونو د هغې له ډلې د الفارابي پوهنتون ترمنځ هر اړخیزې خبرې وشوې.
د کابل پوهنتون رییس کابل پوهنتون ته د قزاقستان سفیر ته ښه راغلاست وویل او له افغانستان سره یې د دې هیواد په ځانګړې توګه د هیواد له لوړو زده کړو سره یې له مرستو قدرداني وکړه او د دې مرستو د دوام غوښتونکی شو او همدارنګه یې د دې هیواد د خپلواکۍ ۳۰ مې کلیزې مبارکي وویله. پوهاند بابري وویل، چې د هیواد د لوړو زده کړو له برخې څخه زیات افغان محصلین په دوست هیواد قزاقستان کې په مختلفو کچو کې په زده کړو بوخت دي او دا د دواړو هیوادونو ترمنځ د نیکو اړیکو نښه ده.
د کابل پوهنتون د رییس په وینا په 2019 کال کې د کابل پوهنتون او د قزاقستان الفارابي پوهنتون ترمنځ د همکاریو هوکړه لیک لاسلیک شوی دی او د دې هوکړه لیک پر بنسټ د کابل پوهنتون استادانو او علمي کادر غړو ته په مختلفو کچو کې د زده کړو زمینه به برابره شي. پوهاند بابري وویل، چې کابل پوهنتون د کمیت او زیربنا برخو کې ښه پرمختګونه لري او د کیفیت په برخه کې هم ښه کار کوي تر څو وضعیت ښه شي او په سیمه کې به په یوه نمونه يي پوهنتون بدل شي او پدې برخه کې د دوست هیواد قزاقستان د مرستو او همکاریو غوښتونکی هم دی.
همدارنګه په کابل کې د قزاقستان جمهوریت سفیر عالم خان یاسین ګیلدیف د کابل پوهنتون رییس او رهبري هیئت له ملاقات څخه د مننې ترڅنګ د همکاریو په ښه والي په ځانګړې توګه د قزاقستان او افغانستان ترمنځ یې په تحصیلي همکاریو تاکید وکړ. د قزاقستان سفیر زیاته کړه، چې د دواړو هیوادونو ترمنځ اقتصادي او سیاسي اړیکې عالي دي او مونږ هڅه کوو، چې د دواړو هیوادونو ترمنځ فرهنګي او تحصیلي اړیکې هم عالي او وغوړيږي؛ ځکه دا دواړه هیوادونه فرهنګي او تاریخي غوره اړیکي لري. ښاغلي ګیلدیف زیاته کړه، چې قزاقستان خوښ دی ترڅو د هوکړه لیک پربنسټ، چې د کابل پوهنتون او الفارابي پوهنتون ترمنځ لاسلیک شوی دی د پښتو ژبې او دري ژبې څانګې د قزاقستان په الفارابي پوهنتون او د قزاقي ژبې څانګه په کابل پوهنتون کې فعاله کړي.
همدارنګه نوموړي زیاته کړه، چې د کرونا اپیدمي د افغانستان او قزاقستان ترمنځ د تحصیلي او اکاډمیکو هوکړې د ځینو برخو د پلي کېدو پر وړاندې خنډ شوي دي او د دې اپیدمي په کمېدو سره به د دې برخې وضعیت ښه شي. د دې لیدنې په پای کې د کابل پوهنتون رییس او د قزاقستان جمهوریت سفیر د علمي شورا تالار ته لاړل او هلته یې د یو شمېر پوهنځیو رییسانو، استادانو او محصلینو سره هم وکتل. پدې لیدنه کې استادانو او محصلینو د قزاقستان سفیر سره یې د تحصیلي بورسیو پر ورکړه پوښتنې وکړې او ځوابونه واورېدل.
