د لسو پوهنتوني کتابونو مخکتنې غونډه ترسره شوه
![56556](/sites/default/files/2024-05/2.gif)
دا کتابونه د کابل پوهنتون د ژبو او ادبیاتو پوهنځي او د افغانستان پېژندنې د ماسترۍ او دکتورا محصلينو د ګډ کار او همدارنګه د پښتو ډيپارټمنټ استاد پوهاند اسماعيل يون په زیار چمتو شوي دي، چې د ژبو او ادبیاتو پوهنځي په کوربتوب يې د مخکتنې غونډه ترسره شوه. په دې تړاو جوړو شویو مراسمو کې د کابل پوهنتون رهبري، د لوړو زده کړو وزارت او علومو اکاډمۍ استازو، استادانو، محصلینو او فرهنګپالو برخه اخیستې وه.
د کابل پوهنتون رئیس دکتور اسامه عزیز د خپلې وینا پر مهال د پښتو ژبې او ادبیاتو ډيپارټمنټ د محصلينو او همدارنګه د پوهاند یون دا نوښت ګټور یاد کړ او زیاته یې کړه، چې د ماسترۍ او دکتورا مرحله د څېړنې او تحقیق مرحله ده، په کار دي چې د هيواد پوهنتونونو کې دغې اړخ ته لا زيات پام وشي او د وخت اړتيا ته په پام سره د څېړنې موضوعات انتخاب شي.
د لوړو زده کړو وزارت علمي معين دوکتور لطف الله خیرخوا په خپلو خبرو کې د دې ابتکار ستاينه وکړه او ويې ويل، په کار دي د محصلينو ظرفیتونو څخه سمه ګټه واخیستل شي او د دوی استعدادونه په علمي لحاظ ښه مديريت شي.
د هيواد نوموتي ليکوال استاد محمد آصف صمیم د خپلې وینا په ترڅ کې د پښتو ادب پر اوسني وضعیت د خبرو ترڅنګ له ځوان نسل څخه وغوښتل چې خپل اساسي مسوولیتونه وپېژني همدارنګه يې اړينه يې وګڼله چې د کتابونو د ليکلو ترڅنګ دې د کتاب د کره کتنې برخه کې هم د محصلينو روزنې ته ځانګړی پام وشي.
په پای کې د کابل پوهنتون د پښتو ادبیاتو استاد پوهاند محمداسمعیل یون له ټولو ویناوالو څخه د مننې ترڅنګ د خپلو لیکل شویو کتابونو د محتویاتو په اړه بشپړ معلومات وړاندې کړل، او ويې ویل، چې استاد او محصل باید په درسي بهیر کې ګډ کار وکړي ترڅو د څېړنې او لیکوالۍ برخه پیاوړې شي.