په کابل پوهنتون کې د نوښت او ظرفیت جوړونې بنسټ له لوري د بریالیو مېرمنو جشنواره جوړه شوه
د بریالیو مېرمنو جشنواره د روان کال د سلواغې میاشتې په ۱۳ نېټه د دوشنبې په ورځ د نوښت او ظرفیت جوړونې بنسټ له لوري د سلګونو ځوانانو په ګډون د کابل پوهنتون په مرکزي ايډيټویم کې جوړه شوه.
د کابل پوهنتون رییس پوهاند دکتور محمد عثمان بابري د جشنوارې د پایلو اعلان پدې برنامه کې، چې د سلګونو ګډون کوونکو په شتون کې جوړه شوې وه خبرې وکړې او د دې برنامې په جوړېدو د خوښي ترڅنګ یې له هغو مېرمنو، چې د هیواد په دې سختو شرایطو او دردونو سره په مختلفو برخو کې په ډول- ډول فعالیتونو کې مشعولې دي او هغو کسانو، چې د جشنوارې وروستئ مرحلې ته لاره پیدا کړې وستایل او هغوی یې د هیواد پیاوړې او بریالۍ مېرمنې یادې کړې. ښاغلي بابري له دې مېرمنو وغوښتل تر څو خپل علم، پوهه او ګټور فعالیتونه زیات کړي او په مختلفو برخو کې د ښځو خالي ځاي ډک کړي.
د دې بنسټ رییس سید احمد عبیدي او د هیواد د ځینو نورو ادارو استازو هم هر یو په خپل وار سره پدې غونډه کې خبرې وکړې، د هیواد د ښځو د لاسته راوړنو او فعالیتونو د ستاینې ترڅنګ یې د دې هڅو او پیاوړتیا دوام باندې تاکید وکړ او د دې ښځو له کارونو څخه یې ملاتړ وکړ.
پدې جشنواره کې د مختلفو برخو څخه د ۷۰۰ په شاوخوا کې ښځو د مختلفو رقابتي دورو په تر سره کولو سره ګډون کړی وو، په پای کې ۱۰۰ بریالیو مېرمنو ته ستاینلیکونه ورکړل شول او له دې ډلې ۱۵ ښځو ته تندیسونه او ډالۍ ورکړل شوې.
د نوښت او ظرفیت جوړونې بنسټ د دې جشنوارې موخه د ښځو د کارونو او فعالیتونو ستاینه یاده کړه، چې په هیواد کې د بې عدالتيو او جګړې د شتون سره همدارنګه په عدالت باور لري او په مختلفو برخو کې فعالیت تر سره کوي. یو شمېر مېرمنو د ستاینې او ډاليو ورکړې پدې غونډه کې یې د زیاتو اغېزمنو کارونو او فعالیتونو په تر سره کولو تاکید وکړ او د نه توقف او تسلیمیدو څخه یې یادونه وکړه.
