په فارمسي پوهنځي کې د غذایي توکو او درمل ملي ادارې لخوا رالېږل شویو فارمسیوتیکي محصولاتو د کیفیت کنټرول آزموینې پرانیسته وشوه.
د ریاست الوزراء درانه مقام د فرمان له مخې د ۱۴۰۲ هجري لمریز کال د ثور د میاشتې په ۲۴ نیټه د پنجشنبې په ورځ د کابل پوهنتون فارمسي پوهنځي کې د غذایي توکو او درمل ملي اداري لخوا رالیږل شویو فارمسیوتیکي محصولاتو د کیفیت کنترولو آزموینې پرانسیته وشوه. د غونډې پرانېستې مراسمو کې د کابل پوهنتون رئیس ښاغلي دکتور اسامه عزیز، او د فارمسي پوهنځي استادانو ګډون درلود.
د فارمسي پوهنځي رئیس پوهنوال آقامحمد ژکفر د پوهنتون رئیس ته د ښه راغلاست ترڅنګ ددوی له ملاتړ څخه چې د فارمسي پوهنځي د عایداتي پلانونه یې د ریاست الوزراء تر مقام پورې ورسول مننه وکړه او د پوهنځي استادانو او محصیلنو سره یې خوراکي توکو او درمل ملي ادارې فارمسیوتیکي محصولاتو د کیفیت ارزونې آزموینې او د هغه په علمي او مالي ګټو په اړه یې مفصل معلومات شریک کړل.
هغه زیاته کړه، په راتلونکي کې هڅه کوي، چې د زرقي محصولاتو تعقیم او پایروجن، د نباتې محصولاتو او د مایکروبیولوژي ځانګړي آزمویښتونه هم په پوهنځي کې ترسره کړي، چې په دې برخه کې زیات کار ترسره شوی دی.
د کابل پوهنتون رئیس ښاغلي دوکتور اسامه عزیز د فارمسي پوهنځي دغه نوښت وستایه او دا یې د دغه پوهنځي د استادانو او رهبرۍ د هڅو پایله وبلله. هغه زیاته کړه، پوهنتون باید یوازې تر نظري مسایلو پورې محدود نه وي او محصلینو ته باید د عملي کار زمینه برابره شي. همدارنګه دکتور عزيز زياته کړه، چې د سږني کال په بودجه کې يې د لابراتوارونو په ځانګړي ډول د فارمسي پوهنځي د لابراتوارونو تمويل او تجهيز ته پوره پاملرنه کړې ده.
د غونډې په پای کې د فارمسي پوهنځي استادانو د خوراکي توکو او درمل ملي ادارې له لوري د رالیږل شویو درملو د کیفیت د کنټرول عملي آزموینه ترسره کړه، چې د پوهنتون د رئیس له خوا یې ستاینه وشوه.
