په کابل پوهنتون کې د کرونا واکسین د تطبیق بهیر پیل شو
د کرونا (کوویډ۱۹) ویروس واکسین د تطبیق بهیر د روان کال د غوايي/ ثور په ۱۱ نېټه د شنبې په ورځ د کابل پوهنتون استادانو، محصلینو، اداري کارکوونکو، امنیتي ځواکونو او خدماتي کارکوونکو ته د عامې روغتیا وزارت کارکوونکو له لوري د کابل پوهنتون د رییس او مرستیالانو په شتون کې پیل شو.
د کابل پوهنتون رییس پوهاند دکتور محمد عثمان بابري د عامې روغتیا وزارت له مسوولینو او کارمندانو څخه ستاینه وکړه، چې د کابل پوهنتون استادانو، محصلینو او کارمندانو یې د واکسین تر پوښښ لاندې نیولي دي مننه وکړه. پوهاند بابري د کرونا ویروس درېمه څپه خطرناکه وبلله او د کابل پوهنتون له استادانو، محصلینو او کارمندانو څخه یې وغوښتل، چې د دې ویروس څخه د ساتنې په موخه د خپل ځانونه واکسیون کړي.
همدارنګه د عامې روغتیا وزارت د ملي کتلوي معافیت ریاست د افهام او تفهیم مسوول ډاکټر ګلاب خان ایوب د کرونا درېمه څپه وژونکي او خطرناکه وبلله او ویې ویل، چې د ګڼې ګوڼې ځایونه لکه پوهنتونونه، تحصیلي او ښوونیز بنسټونه له ګواښ سره مخ دي او په همدې موخه باید د دې بنسټونو استادان، محصلین او کارمندان باید واکسین شي او د عامې روعتیا وزارت د دې کار تر سره کولو ته ژمن دی.
په کابل پوهنتون کې د کرونا واکسین پلي کېدل په اتو سیمو کې، چې د دې پوهنتون ټول پوهنځي به پکې شامل وي د دوه ورځو لپاره به دوام ومومي. کابل پوهنتون د زر استادانو، شپږ ویشت زره محصلینو او اووه سوه اداري کارمندانو او خدماتي کارکوونکو درلودونکی دی.
