د کابل پوهنتون فارمسي پوهنځي د ناب او برایت فارما درمل تولیدي فابریکو او د نورم ملي ستندرد ادارې سره د همکارۍ هوکړه لیک لاسلیک شو
د کابل پوهنتون فارمسي پوهنځي د روان کال وږي میاشتې په ۲۴ مه نېټه د ناب او برایت فارما درمل تولیدي فابریکو او د نورم ملي ستندرد ادارې سره د همکارۍ هوکړه لیک لاسلیک کړ.
ددې موافقه لیک موخه د زده کړیالانو د علمي کچې او مهارتونو لوړول، د کاري او علمي ساحې ترمنځ داړیکو لاغښتلي کېدل دي.
د کابل پوهنتون رئیس ښاغلي دکتور اسامه عزیز د نوموړي هوکړه لیک د لاسلیک په جوړه شوې غونډه کې د فارمسي پوهنځي له رهبرۍ څخه د قدرداني ترڅنګ نوموړې هوکړه لیک په معنوي لحاظ داهمیت وړ وباله او ددې هوکړه لیک په عملي کولو یې ټینګار وکړ.
ښاغلي عزیز زیاته کړه، چې د فارمسي پوهنځي د استادانو له علمي کچې او وړتیاوو څخه باید په دولتي او خصوصي ادارو کې د خلکو په خدمت کې ترې سالمه ګټه واخیستل شي.
د نورم ملي ستندرد ادارې رئیس الحاج ملا فیض الله تمیم د کابل پوهنتون سره د یاد هوکړه لیک لاسلیک کول غوره ګام یاد کړ او هغه یې د دواړو لوریو په ګټه وباله.
ښاغلي تمیم وویل: موږ د فارمسي پوهنځي زده کړیالانو ته دعملي فعالیتونو په برابرولو کې ژمن یو.
د فارمسي پوهنځي رئیس ښاغلي پوهنوال آقا محمد ژکفر وویل چې ددې هوکړه لیکونو موخه د نورم ملي استندرد ادارې، د ناب او برایټ فارما د درمل جوړولو فابریکو د کارکوونکو د فني پوهې لوړول، د ګډو علمي څېړنو ترسره کول، په ګډه د علمي کنفرانسونو او سمینارونو په لار اچول دي.
په همدې حال کې دبرایت فارما او ناب درملو تولیدي فابریکو مسئولین د یاد هوکړه لیک له لاسلیک څخه خوښي څرګنده کړه، او ټینګار یې وکړ چې دوی د هوکړه لیک ټولو مواردو پلي کېدو ته چمتو او ژمن دي.
