په کابل پوهنتون کې د ارزانه او زلزلې پر وړاندې د محکمو کورونو د برابرولو په اړه بحث تر سره شو
دغه بحث چې د انجینري پوهنځي لخوا څخه جوړ شوی وو، د کابل پوهنتون رئيس دکتور اسامه عزيز په پوهنتون کې د دغه محفل په جوړېدو خوښي وښوده او ويې ويل، چې یاده موضوع د هېواد يوه اړتيا ده او د استادانو څخه هيله لرو چې د هیواد د ستونزو د هواري لپاره طرحې جوړې کړي او د انجینرۍ پوهنځي دغه کار یې د ستایلو وړ وبللو.
دکتور عزیز زیاته کړه چې هېواد تل له طبیعي پېښو سره لاس او ګریوان دی او باید داسې پلانونه وړاندې شي چې پر بنسټ یې په ښارونو، کلیو او بانډو کې داسې کورونه او ودانۍ جوړې شي چې لګښت یې کم او د طبیعي پېښو پر وړاندې یې مقاومت زیات وي او ټینګار یې وکړ چې په هېواد کې د طبیعي پېښو د رامنځته کېدو سره سم، مخکې او وروسته دا ډول پروګرامونه زیات او پایلې یې د رسنیو له لارې له خلکو سره شریکې شي.
همدارنګه پدغه محفل کې د پوهنتون دریو تنو استادانو هر یو پوهاند امین الله محمود، پوهاند جهانګیر بختیاري او پوهاند شمس یزداني د زلزلې د لاملونو، د ځان ساتنې د لارو چارو، د ارزانه او زلزلې پر وړاندې د محکمو کورونو د جوړولو په اړه خپل پریزینټشنونه د پوهنتون د رئیس، معاونینو، استادانو او خبریالانو په حضور کې وړاندې کړل چې د حاضرینو د تود هرکلي سره مخ شول او یاد محفل د استادانو لخوا څخه د حاضرینو پوښتنو ته په مناسبو ځوابونو ویلو سره پای ته ورسېد.
