د امر بالمعروف او نهی عن المنکر وزارت پلاوي د کابل پوهنتون له استادانو او کارکوونکو سره وکتل
د مولوي فضل الربي فضلي په ریاست د امر بالمعروف او نهی عن المنکر وزارت پلاوي د روان کال د غوايي په ۲۸ نېټه د یوې ناستې په لړ کې په داسې حال کې، چې د کابل پوهنتون مالي او اداري مرستیال ښاغلي مولوي معلم احمد حقاني هم شتون درلود د پوهنتون له استادانو او کارکوونکو سره وکتل.
په پیل کې مولوي معلم احمد حقاني د امر بالمعروف او نهی عن المنکر وزارت پلاوي ته ښه راغلاست وویل او دې ناستې ته د راتګ لپاره یې د کابل پوهنتون له استادانو او محصلینو څخه هم مننه وکړه او ویې ویل، چې زمونږ ټولنه یوه باعزته، دینداره او با شهامته ټولنه ده او الحمد الله کابل پوهنتون د اسلامي او شرعي ارزښتونو ښکارندوی دی او د استادانو په مرسته دا ارزښتونه ورځ په ورځ زیات پیاوړي کیږي.
مولوي حقاني تاکید وکړ، چې پدې بنسټ کې د نجونو او هلکانو لپاره د اسلامي اصولو او ارزښتونو په پام کې نیولو سره د زده کړو مناسب چاپېریال شتون لري او دا د پوهنتون د رهبري د هڅو او کار پایله ده.
وروسته ښاغلي مولوي فضل الربي فضلي د امر بالمعروف او نهی عن المنکر وزارت پلاوي رییس د اسلامي ارزښتونو، په ټولنه کې د اسلامي اصولو او رسومو د رعایت کولو څرنګوالي او په ځانګړې توګه په اکاډمیکو ځایونو او تحصیلي بنسټونو او د نظام د رهبري ترمنځ د اړیکو پر اړتیا، د استادانو او محصلینو اړیکې، په پوهاوي کې د استادانو رول، د اسلامي اصولو پلي کول او د دیني ارزښتونه په پراختیا او تحقق باندې یې خبرې وکړې.
نوموړي د حجاب په هکله د امیرالمومنین په فرمان باندې خبرې وکړې او پدې برخه کې د استادانو او مسوولینو د همکاري غوښتونکي شول.
