د کابل پوهنتون د فارمسي په پوهنځي کې د درملو کیفیت د ارزونې لپاره د کوچني لابراتوارونو تر نامه لاندې ورکشاپ جوړ شو
د درملو د کیفیت د ارزونې لپاره د کوچنیو لابراتوارونو ښوونیز ورکشاپ د کابل پوهنتون د فارمسي پوهنځي او پارټیسپ (Particip) موسسې، د روغتیا وزارت او د خوړو او درملو ادارې له لوري د کابل پوهنتون د فارمسي پوهنځي د ناستو په تالار کې جوړ شو.
دا ورکشاپ د لسو ورځو لپاره د کابل پوهنتون د رییس، د فارمسي پوهنځي رییس او استادانو، د روغتیا وزارت او د خوړو او درملو ادارې استازو او ۲۴ فارمسیستو څېړونکو په ګډون د افغانستان د درملو د څارنې او ارزونې د څرنګوالي زده کړې په موخه جوړ شوی دی او په پام کې ده ښوونیزې دورې وروسته د درملو د ارزونې عملي او لابراتواري کار، چې د ټول هیواد له ۲۴۰۰ په شاوخوا کې درملتونونو څخه راټولې شوي دي، د هیواد د درملو د کیفیت د غوره والي سره د مرستې او ارزونې په موخه د کابل پوهنتون د فارمسي پوهنځي په لابراتوارونو کې پیل شي.
اساسي او باکیفته درملو ته لاسرسی د هیواد د روغتیا په برخه کې لویو ننګونو له ډلې څخه شمېرل کیږي ولې تر اوسه پورې په کور دننه د درملو تولید د دې ستونزو په له منځه وړلو کې ډېره کمه ونډه اخیستې او زیاته برخه یې له بهرنیو هیوادونو څخه واردیږي. همدارنګه اړتیا ده تر څو د روغتیا وزارت د وارداتي درملو له کیفیت څخه ډاډ تر لاسه کړي، چې پدې توګه د پارتیسپ موسسې د هالنډ هیواد د استوایي سلطنتي انسټیټوټ (KIT) او د روغتیا وزارت او کابل پوهنتون په همکاري د درملو د کیفیت ارزونې خدمتونه (Drug Quality Assessment) یې د روغتیا پروژې په نوم تر سره کړي.
دا ورکشاپ د درملو د کیفیت ارزونې په موخه، د هیواد عامه او خصوصي سکتور د درملو کیفیت د ښه والي سره د مرستې « د هیواد روغتیا وزارت ته د دولتي او خصوصي سکتور په برخه کې د اساسي درملو د کیفیت په هکله د دقیقو معلوماتو ورکړه» ده.
