په کابل پوهنتون کې "د ښځو حقوق او غیر رسمي عدالت" کنفرانس جوړ شو
د روان کال د کب میاشتې په ۲۵ نېټه "د ښځو حقوق او غیر رسمي عدالت " کنفرانس د کابل پوهنتون د رییس پوهاند دکتور محمد عثمان بابري او یو شمېر استادانو، څېړونکو او محصلینو په ګډون د کابل پوهنتون د پالیسي څېړلو ملي مرکز کې جوړ شو. په پیل کې د کابل پوهنتون رییس پوهاند دکتور محمد عثمان بابري د هیواد د د ښځو مقام، رول او ستونزو په هکله خبرې وکړې. ښاغلي بابري وویل د ښځو محروم قشر د هیواد نیم نفوس جوړوي او باید څېړنیز بنسټونه په ټولنه کې د ښځو پر وړاندې د حقونو، رول او ستونزو د تحقق په اړه زیات کار وکړي.
د کابل پوهنتون رییس زیاته کړه، چې په هیواد کې ښځې له زیاتو ستونزو لاس او ګرېوان دي او د دې مسئلې دلیل د جګړې په مټ د قانون د پلي کېدو کمزورتیا ده. نوموړي تاکید وکړ، چې د هیواد په دولتي، علمي او څېړنیزو بنسټونو کې د ښځو زیات شتون د هر اړخیز پرمختګ سبب کیږي. د ښاغلي بابري په وینا د قانون د نه پلي کېدو په دلیل تر اوسه د هیواد په لرې پرتو سیمو کې تر اوسه غیر رسمي عدالت عملي کیږي او دې عدالت په زیاتو برخو کې اسلامي او د هیواد ملي ارزښتونه او د ښځو حقونه تر پښو لاندې کوي.
په ورته مهال پدې کنفرانس کې د کابل پوهنتون د حقوقو او سیاسي علومو پوهنځي استاد بریالي حکیمي وویل، چې افغانان زیات غیر رسمي عدالت ته مراجعه کوي. د نوموړي په وینا د دې کار دلیل د قانون نه حاکمیت او د هیواد په عدلي او قضايي ادارو کې د فساد شتون دی.
له بل لوري د حقوقو او سیاسي علومو پوهنځي بلې استادې او د ښځو حقونو فعالې پدې کنفرانس کې وویل، چې په غیر رسمي عدالت کې د ښځو حق او حقونه زیات تلف کیږي. د مېرمن فرید په وینا د دې کار دلیل په تصمیم نیوونکې مرجع کې د ښځو نشتون او د غیر رسمي عدالت ترسره کول او همدارنګه د قانون نه حاکمیت دی. اغلې فرید تاکید وکړ، چې په هیواد کې د رسمي او غیر رسمي عدالت ترمنځ د یوې هر اړخیزه پالیسي په جوړېدو سره د دواړو ترمنځ به یوه اړیکه جوړه شي. دا په داسې حال کې ده، چې ښځه په ټولنه کې ضرر لیدونکی قشر دی او دولت هڅه کوي تر څو په مختلفوبرخو کې له دې قشر څخه خپل ملاتړ ته پراختیا ورکړي.
