د شرعیاتو پوهنځي له استادانو سره مشورتي ناسته وشوه
د کابل پوهنتون د شرعیاتو پوهنځي له استادانو سره د دې پوهنځي د لا ښه مؤثريت او پرمختګ په موخه د لوړو زده کړو محترم وزیر شیخ الحدیث مولوي نداء محمد ندیم صاحب مشورتي ناسته ترسره کړه.
په دې ناسته کې د کابل پوهنتون رئيس دکتور اسامه عزيز د ښه راغلاست وينا ترڅنګ د شرعياتو پوهنځي پر اهميت او د استادانو پر مسؤوليت رڼا واچوله.
همدا راز د تحصيلي نصاب رئیس مفتي عبد الرؤوف فراهي د شرعياتو او اسلامي ثقافت د نوي تحصيلي نصاب د ځانګړنو اړوند معلومات وړاندې کړل او ډاډ يې څرګند کړ چې د هيواد او ټولنې اړتيا ته په پام سره پرې کار شوی دی.
د لوړو زده کړو محترم وزير په خپله وينا کې د علماء کرامو مسؤلیت دروند یاد کړ او سپارښتنه یې وکړه چې د ځوان نسل په اصلاح کې خپلې هڅې لا ګړندۍ کړي. همدارنګه یې له استادانو څخه غوښتنه وکړه چې د محصلینو د علمي روزنې په برخه کې لا زيات متوجه شي او په دې برخه کې د شته نيمګړتياوو د حل لپاره خپل نظرونه شريک کړي.
د ناستې په پای کې د پوهنتون د رهبرۍ او د شرعياتو پوهنځي د استادانو نظرونه واوريدل شول، ياد نظرونه د پوهنځي پر توسعې، د محصلينو د جذب پر څرنګوالي، پر دندو د فارغ التحصيلانو پر ګومارنې، د استادانو پر ستونزو راڅرخيدل او د محترم وزير لخوا د همکارۍ ډاډ ورکړل شو.
