د کابل پوهنتون فارمسي پوهنځي پواسطه د طب او فارمسي ورستیو څیړنو لومړی کنفرانس ترسره شو
نوموړی کنفرانس د روان کال لیندۍ میاشتې په ۵ نېټه ددې پوهنځي د څیړنې کمېټې په نوښت د کابل پوهنتون امام قتیبه (رح) په تالار کې ترسره شو.
په دې کنفرانس کې د رهبرۍ هیئت، د کابل پوهنتون پوهنځیو رئیسانو او استادانو، د عامې روغتیا وزارت، د افغانستان د غذا او درملو ملي ادارې، د افغانستان ستندرد ملي ادارې، د ممیزو، سبزیجاتو، میوه جاتو، او د افغانستان طبي بوټو د صادراتو پراختیا ادارې، د امارتي لوړو زده کړودولتي او خصوصي بنسټونو، طب او فارمسي پوهنځیو او ټولو ښکېلو بنسټونو استازو برخه اخیستې وه.
د کنفرانس په پیل کې د فارمسي پوهنځي رئیس ښاغلي پوهنوال آقا محمد ژکفر د کنفرانس په اړ او د کنفرانس لپاره د څیړنیزو مقالاتو غوره کېدو په اړه وضاحت ورکړ. او زیاته یې کړه؛ چې د فارمسي پوهنځی چمتو دی؛ ترڅو هرکال دې ته ورته کنفرانسونه ترسره کړي، وروسته د کابل پوهنتون رئیس دوکتور اسامه عزیز پخپلو خبرو کې د کابل پوهنتون فارمسي پوهنځي استادانو د عملي څیړنو ترسره کول چې د پوهنتون اساسي رکن شمېرل کیږي ستاینه و کړه او هغوی یې هڅول.
وروسته د کابل پوهنتون علمي څیړنو مرستیال ښاغلي دوکتور حامد سالاري خبرې وکړې او دکابل پوهنتون د څیړنو بنسټیز کولو لپاره د نویو کړنلارو ژمنه وکړه. د افغانستان اکاډمي علومو مرستیال په پخپلو خبرو کې ددې سمینارونو ستاینه وکړه او هغه یې ګټور یاد کړ. په دې کنفرانس کې د کابل پوهنتون فارمسي پوهنځي او همدارنګه د طب، بلخ او غالب پوهنتون استادانو او محصلینو ۱۱څیړنیزې مقالې وړاندې کړې چې د ګډونوالو د خوښې وړ و ګرځېدې، نوموی کنفرانس د علمي مقالو وړاندې کوونکو او د کنفرانس علمي کمېټې غړو باندې د ستاینلیکونو او تصدیق پاڼو له وېشلو وروسته په دعایه پای ته ورسېد.
