د چاپېریال ساتنې پوهنځی د پېښو مدیریت دیپارتمنت د ماسټري پروګرام نصاب و ارزول شو
پدغه یو ورځني ورکشاپ کې چې د چاپیریال ساتنې پوهنځي لخوا څخه جوړ شوی و، د دغه پوهنځي د پیښو د مدیریت دیپارتمنت د ماسټرۍ برنامې نصاب و ارزول شو. پدې ورکشاپ کې د کابل پوهنتون یو شمېر استادانو، د پېښو د مدیریت اړوند مؤسسو او بنسټونو استازو هم شتون درلود.
ددغه ورکشاپ موخه د چاپېریال ساتنې پوهنځي د ماسټرۍ برنامې د نصاب لاغني کول او د اړونده ادارو نظرونه پکې ځای پرځای کول وو.
د ورکشاپ په پیل کې د کابل پوهنتون د علمي چارو مرستیال ښاغلي پوهاند محمد شفیع شریفي د پېښو د مدیریت په برخه کې د ماسټرۍ برنامې د رامنځ ته کولو په اړتیا لکه بیولوژیکي، جیو فزیکي، هایدرومیترولوژي، د اقلیم د بدلون او د غیر طبیعي پېښو لکه د چاپېریال ساتنې او تخنیکي پېښې چې زموږ ټولنه له څو لسيزو راهيسې ورسره مخ او ورڅخه اغېزمنه ده خبرې وکړې او پدې برخه کې یې د پېښو د مدیریت دیپارتمنت کې د ماسټرۍ برنامه ګټوره وبلله.
هغه همدارنګه د یاد ورکشاپ له ګډونوالو غوښتنه وکړه چې د یادې برنامې د نصاب د مرور او ارزیابۍ په وخت کې د پېښو د مخنیوي، د پېښو د کموالي، پېښو ته د رسیده ګۍ او د پېښو وروسته د بیا رغونې ټکي د د یاد نصاب په بشپړولو کې په نظر کې ونیسي.
وروسته د چاپېریال ساتنې پوهنځي رئیس ښاغلي پوهندوی محمد داود شیرزاد د دغه ورکشاپ موخې د ورکشاپ له ګډونوالو سره شریکې او هغوی ته یې تشریح کړې او له دوی یې وغوښتل چې خپل نظرونه او لیدلوري د پېښو د مدیریت د کریکولم په اړه راسره شریک کړي.
پدغه ورکشاپ کې ښاغلي پوهنیار مجیب الرحمن احمدزي هغه پریزینټشن چې د پېښو مدیریت دیپارتمنت د ماسټرۍ برنامې د کریکولم په اړه یې تهیه او ترتیب کړی وو له حاضرینو سره شریک کړ او د هغوی د توجه وړ وګرځېد.
وروسته د یاد ورکشاپ ګډونوال په پنځه نفري ګروپونو باندې وویشل شول او د کریکولم په اړه یې خپل نظریات، وړاندیزونه او لیدلوري مطرح کړل.
یاد ورکشاپ د چاپېریال ساتنې پوهنځي د رئیس ښاغلي پوهندوی محمد داود شیرزاد لخوا د جمع بندۍ وروسته پای ته ورسېد.
