کابل پوهنتون په افغانستان کې د انجینري په برخه کې د ننګونو، حل لارو او وروستیو پرمختګونو په اړه ملي او علمي کنفرانس دائر کړ
دغه کنفرانس د انجینرۍ پوهنځي په نوښت، د کابل پوهنتون د رهبري پلاوي، د لوړو زده کړو وزارت د علمي چارو مرستیال، د ښار جوړونې، کلیو او پراختیا وزارتونو استازو، د کابل ښاروالۍ معاون او د خصوصي سکتور استازو په شتون کې جوړ شو.
ددغه کنفرانس لپاره څه باندې ۶۰ مقالې راټولې شوې وې چې لدې جملې څخه یې ۲۸ د انجینري پوهنځي د ژوري هیئت لخوا غوره او د غونډې ګډونوالو ته وړاندې شوې.
د دغه کنفرانس موخه د هېواد د انجینرۍ او مهندسۍ په برخه کې د ننګونو او حل لارو څېړل وو چې پایلې به یې د سکتور ي ادارو او بنسټونو سره شریکې شي.
په یاد کنفرانس کې د کابل پوهنتون رئيس ښاغلي دکتور اسامه عزيز وويل چې د دغه علمي او څېړنيز کنفرانس پايلې به له اړونده ادارو سره شريکې کړي. نوموړي د نظام له سکتوري څانګو وغوښتل، چې د مهمو ملي مسایلو په اړه د کابل پوهنتون په ګډون د هېواد له علمي بنسټونو سره همغږي او د ستونزو د حل لپاره په ګډه کار وکړي.
همدارنګه په یاد کنفرانس کې د لوړو زده کړو وزارت علمي مرستیال ښاغلي لطف الله خیرخواه خبرې وکړې او له پوهنتونونو یې وغوښتل چې د هېواد په عامو مسایلو او د ستونزو په حل کې مثبت رول ولوبوي. هغه هیله څرګنده کړه، چې د کابل پوهنتون دغه ډول علمي کړنې به د هېواد د نورو پوهنتونونو لپاره الګو او بېلګه وګرځي.
پدغه کنفرانس کې چې یوه ورځ یې دوام وکړ، د انجینرۍ پوهنځي استادانو د اوبو سکتور، برېښنا او انرژۍ، مخابراتو او معلوماتي ټکنالوژۍ، ښاري پراختیا، ترانسپورت او نورو موضوعاتو په اړه خپلې څېړنیزې مقالې د غونډې ګډونوالو ته وړاندې کړې.
