د کابل پوهنتون د محصلینو اتحادیې له لوري د کابل پوهنتون د محصلینو د شهادت د څلویښتي څخه د یادونې په موخه د قران کریم د ختم مراسم جوړ شول
د کابل پوهنتون د لړم میاشتې دولسمې پېښې د شهیدانو د شهادت د څلويښتي څخه د یادونې په مناسبت، چې په هغه کې یو شمېر شهیدان او ټپیان شوي وو د روان کال د لیندۍ میاشتې په ۲۵ نېټه د سې شنبې په ورځ د شهیدانو او ټپیانو د کورنیو په حضور کې د کابل پوهنتون په مرکزي ایډيټوریم کې د قرانکریم د ختم مراسم جوړ شول.
دا مراسم، چې د کابل پوهنتون د محصلینو چارو مرستیال پوهندوی فیصل امین، د پوهنتون د محصلینو اتحادیې د رییس او غړو، د دې پېښې د شهیدانو او ټپیانو د کورنیو د غړو او د پوهنتون د محصلینو په ګډون جوړ شوي وو؛ دوه برخې لرلې لومړۍ برخه یې د قرانکریم ختم او دوهمه برخه کې ویناوې او د کابل پوهنتون د لړم دولسمې پېښې د شهیدانو لنډ مستند فلم او د شعر دکلمه درلوده.
پدې مراسمو کې د محصلینو چارو مرستیال پوهندوی فیصل امین په پیل کې د دې مراسمو ټولو ګډونوالو ته ښه راغلاست وویل او د دې مراسمو د جوړېدو په هکله یې د محصلینو د اتحادیې زحمتونو د ستاینې ترڅنګ د دې پېښې د شهیدانو او ټپیانو له کورنیو سره خپله همدردي او خواخوږي څرګنده کړه. ښاغلي امین د لړم دولسمې پېښه یې یو دردوونکې، نه هېرېدونکي او وحشاینه وبلله، چې په هېڅ انساني معیار سره نده برابره او د تاریخ په ټولو دورو کې به محکومه وي. نوموړي همدارنګه د خپلو خبرو په پای کې یادونه وکړه، چې ډېر ژر به په کابل پوهنتون کې د هغو محصلینو د شهادت لوړ مقام د یادونې په موخه منار یا نښان جوړ شي تر څو له دې لارې د هغوی یاد په کابل پوهنتون کې تل ژوندی وي.
وروسته د کابل پوهنتون د محصلینو اتحادیې رییس ښاغلي مصطفی ارین، د اتحادیې مالي او اداري مرستیال ښاغلي محمد علي مهدوي، د پېښې یو ټپي ښاغلي سجاد نجاتي، د شهید راهد امین خور بهیجې امین او د شهید محمد رووف پلار ډګروال ... د لړم دولسمې پېښې د شهیدانو او ټپیانو په استازیتوب او د علامه لوړو زده کړو موسسې استازې د دې برنامې د همکار په توګه په خپل وار سره خبرې وکړې او وروسته یوه ټوټه شعر د یو محصل له لوري د شهیدو محصلینو په اړه د استاد فانوس د وایلون غږېدو په هکاري دکلمه شو.
دا برنامه د ماسپښین په ۱:۳۰ پیل او هیواد ته د خیر او کامیابي د دعا په کولو سره د ماسپښین په ۵ بجو پایته ورسېده.
