د کابل پوهنتون لپاره د بدلون برنامه د پوهنتون په رهبري شورا کې پرانیستل شوه
د کابل پوهنتون د بدلون برنامه د روان کال د تلې میاشتې په ۱۴ نېټه د دوشنبې په ورځ د لوړو زده کړو وزارت علمي مرستیال پوهنمل عبدالتواب بالاکرزي، د دې وزارت د مرکزي ادارو یو شمېر رییسانو، د کابل پوهنتون مرستیالانو او د پوهنځیو رییسانو په ګډون د کابل پوهنتون رییس پوهاند دکتور محمد عثمان بابري له لوري پرانیستل او پرې خبرې وشوې.
د کابل پوهنتون رییس پوهاند دکتور محمد عثمان بابري په پیل کې د کابل پوهنتون رهبري شورا ناستې ته د لوړو زده کړو وزارت چارواکو او د دې ناستې نورو غړو راتګ ته ښه راغلاست وویل او وروسته یې په ټولییزه توګه د هیواد اکاډمیکو بنسټونو په ځانګړې توګه د کابل پوهنتون عمومي وضعیت ته کتنه وکړه، په کابل پوهنتون کې د واقعیتونو، نیمګړتیاوو، اړتیاوو او کړنو ارزونو پایلو تر وړاندې کولو وروسته یې موجود وضعیت د منلو وړ ونه باله. پوهاند دکتور بابري وویل: تقریبآ درې میاشتې مخکې د پوهنتون رهبري د ټولو پوهنځیو له رییسانو او امرینو سره مو د تر سره شوو او روانو برنامو په هکله خبرې وکړې او د پوهنځي اداري او کاري دفترونه، ودانۍ، اړوندې سیمې او چاپېریال ... په سمه توګه و څیړي، چې د هغې په پایله کې د موجوده واقعیتونو ترڅنګ د وګړو او ټولنې اړوتیاوې او واقعیتونه او د هیواد د کار بازار د اړتیاوو د برابرولو څرنګوالي یې د پوهنتون په بدلون کې یوه اړتیا یاده کړه او دا طرحه یې « د کابل پوهنتون لپاره د بدلون برنامه» تر عنوان لاندې یې په هیواد کې د علمي او زده کړه ييزو خدمتونو لوړوالی او د خلکو اقتصادي، ټولنیزو او کلتوري پرمختیا ... بنسټیزو غوښتنو ځواب ویونکی وي، برابرې کړي دي. د دې طرحې تر وړاندې کولو او د مهمو او جزيي ټکو تر روښانولو وروسته د لوړو زده کړو وزارت علمي مرستیال او د دې ناستې له نورو غړو څخه د دې طرحې په هکله د نظر او وړاندیزونو غوښتنه وکړه، چې تر ګټورو، اغېزمنو او خبرو وروسته دا طرحه د پوهنتون د رهبري شورا د غړو له لوري تائید او د پوهنتون رییس پوهاند دکتور بابري د خپل ماموریت په دوره کې یې د هغې پر پلي کولو تعهد وکړ.
د لوړو زده کړو وزارت علمي مرستیال پوهنمل عبدالتواب بالاکرزي هم پدې ناسته کې خبرې وکړې او د کابل پوهنتون مسوولینو په هڅو یې خوښي وښوده، د دې وزارت په پالسي جوړونه کې یې په لړ بدلونونو، له پالسیو څخه څارنه او د پلي کېدو څرنګوالی، د وزارت پر ځای په پوهنتون او له پوهنتون څخه ډیپارټمنټونو باندې تمرکز کول، پوهنتونونو او څانګو ته د علمي او نشراتي څېړنو صلاحیتونو او امتیازونو ورکړه ... ته نغوته وکړه او دا طرحه یې د لوړو زده کړو وزارت له لیدلوري او نویو برنامو سره مناسبه او همغږې وبلله. پوهنمل بالاکرزي وویل، چې کابل پوهنتون د لوړ ظرفیت لرونکی دی او دا ظرفیت کولای شي، چې په جامع برنامو سره لکه د کابل پوهنتون بدلون برنامو باندې منسجمې شوي دي او د خلکو او ټولنې هیلې پوره کول او په څېړنه ولاړو لوړو زده کړو ته اغېزمن او د ارزښت وړ کار وکړي. نوموړي د هیواد په ټولو پوهنتونونو کې د بدلون راوستل اړین بللو ترڅنګ، د لوړ زده کړو وزارت د رهبري په استازيتوب یې د کابل پوهنتون رهبري او دې طرحې څخه خپل ملاتړ اعلان او په اغېزمن پلي کولو یې تاکید وکړ.پدې موضوع تر هر اړخیز بحث او خبرو وروسته پوهاند بابري د دې ناستې موخه پر ګډ کار او په ټیمي ګډ کار په تر سره کولو اجماع یاده کړه، ویې ویل: د دې طرحې پلي کېدو باندې کار پیل شوی او د کابل پوهنتون رهبري دې د دې په پوره پلي کېدو او تحقق ته مصممه او متعهده ده او د لوړو زده کړو وزارت او کابل پوهنتون رهبري له همکاري څخه یې مخکې له مخکې مننه وکړه.
دا ناسته، چې د ماسپښین په ۱:۳۰ بجه پیل تر بحث او خبرو وروسته د مازیګر په ۴ بجو هیواد ته د خیر او بریالیتوب د دعا په کولو سره پایته ورسېده.
