په کابل پوهنتون کې «د بنسټي پرمختیا او چاپېر ساتنې مدیریت» علمي کانفرنس جوړ شو.
د سلواغې پر پنځمه د سه شنبې پر ورځ جوړ شو. په دې کانفرنس کې د لوړو زده کړو وزارت علمي معین، د کابل پوهنتون رهبرۍ او استادانو، څېړونکیو، محصلینو، رسنیو د یو شمېر اړوندو بنسټونو استازیو ګډون وکړ.
په کانفرنس کې د موضوع اړوند ویناوې او د کابل پوهنتون د استادانو له خوا اووه ځېړنیزې مقالې وړاندې او د ګډونوالو پوښتنو ته ځوابونه وویل شول. په دې علمی کانفرنس کې د استادانو او څېړونکیو لخوا د چاپېر پر ارزښت، د چاپېر اړوند پېښو او ترې راولړو شویو خطرونو، په هېواد د اوبو او سیلبونو پر مدیریت او د هغې پر ارزښت، په انکشاف کې د بندونو پر ونډه، د جامدو کثافانو پر پاکونې او مدیریت، د کابل ښار پر هوا، د افغانستان د اوبحوزې پر اقلیمي بدلنه، په هېواد کې د اوبو پر بې درېغه لګښت او د مدیریت پر لرو چارو یې، د ښاري ګندګیو پر مدیریت، له ککړتیا څخه د هوا او چاپېر د ساتنې په موخه د نقلیه وسایلو د تنظیم پر اغېزو او... خبرې وشوې.
د کانفرنس له ویناوالو د لوړو زده کړو وزارت علمی معین ښاغلي ډاکتر لطف ا خیرخواه او د کابل پوهنتون رییس ښاغلي ډاکتر اسامه عزیز د قرآن عظیم الشان او نبوي مبارکو احادیثو په رڼا کې د چاپېر پر ارزښت او ساتنه او به دې برخه کې د څېړنې، پوهونې او د اړوند مسالو په زده کړه کې د انسانانو؛ په تېره د علمي بنسټونو، څېړونکیو او روڼ اندو پر ونډه ټینګار وکړ. نوموړیو د دې علمی کانفرنس د جوړېدا له امله خوښي وښوده او علمي بنسټونو له خوا یې د داسې او دېته ورته نورو علمي غونډو، څېړنو او بحثونو په جوړېدا ټینګار وکړ.
دا کانفرنس د کابل پوهنتون د چاپېر ساتنې پوهنځي د رهبري چي په رأس کي يې ښاغلی پوهندوی داود شېرزاد قرار لري او همدا شان د يادي پوهنځۍ استادانو او د اغاخان بنسټ په هڅو او همکارۍ جوړ شو.
