د پوهنتون کارکوونکو لپاره د اداري مهارتونو ورکشاپ ترسره شو
د کابل پوهنتون د کارکوونکو چارو امریت له لوري د اداري اصولو او مهارتونو د زده کړې تر سرلیک لاندې درې ورځنی ښوونیز ورکشاپ د نويو ګمارل شوو اداري کارکوونکو د مسلکي وړتیاوو لوړولو په موخه ترسره شو.
په دغه ورکشاپ کې متخصصینو د اداري اسنادو د مدیریت، د کړنو د ارزونې، د کاري او کلنیو پلانونو د تدوین، د صادره او وارده اسنادو او رسیداتو د ثبت او کارونې د کړنلارو، د اسنادو د دوسیهبندۍ، د منظم او پرمختللي ارشیف سیسټم د تطبیق او د ارزونې پروسې د معیاري ترسره کولو په ګډون د مهمو اداري اصولو او مسلکي مهارتونو په اړه هر اړخیز معلومات او لارښوونې وړاندې کړې.
د یاد ورکشاپ موخه د نويو ګمارل شوو اداري کارکوونکو د مسلکي ظرفیت لوړول، د اداري چارو د معیاري ترسره کولو په برخه کې د هغوی د پوهې او مهارتونو پیاوړتیا او د اداري اصولو له سم تطبیق سره د هغوی بلدتیا وه.
د ورکشاپ په پای کې د ګډونوالو او ویناوالو ترمنځ د پوښتنو او ځوابونو ناسته هم ترسره شوه، چې په ترڅ کې یې ګډونوالو خپلې پوښتنې مطرح کړې او د متخصصینو له لوري ورته لازم وضاحتونه وړاندې شول.
